मनोज जैस्वाल, वाशीम

Washim Karanja Taluka Kamargaon वाशिमच्या कारंजा तालुक्यातील कामरगाव इथे शासकीय निधीच्या उधळपट्टीचा अजब प्रकार समोर आला आहे. ग्रामपंचायत ने २० लाख रुपये खर्च करून नवी इमारत उभारली असताना, याच इमारतीवर किरकोळ दुरुस्तीच्या नावाखाली वाशिमच्या सार्वजनिक बांधकाम विभागाने तब्बल ४० लाख रुपये खर्च केल्याचा अजब प्रकार उघडकीस आला आहे. याप्रकरणी नागरिकांनी संताप व्यक्त केला असून चौकशीची मागणी करण्यात आली आहे.

वाशिमच्या कारंजा तालुक्यातील कामरगाव येथील ग्रामीण रुग्णालयाची इमारत जीर्ण झाली होती. त्यामुळे त्याची दखल घेत तात्पुरत्या स्वरूपात ग्रामपंचायतीने नव्यानेच उभारलेल्या महिला बचत गट माल विक्री केंद्रात स्थलांतरित करण्यात आली. रुग्णालयाने विविध विभागात पार्टिशन करण्यासाठी सार्वजनिक विभागाकडे मागणी करण्यात केली आणि या मागणीची पूर्तता देखील करण्यात आली.

या मागणी नंतर, इमारतीत या विभागाने अल्युमिनियम आणि काचेचे साहित्य वापरून भिंती उभारल्या, तसेच दुसरी काही किरकोळ कामे करण्यात आली. या कामासाठी वाशिमच्या सार्वजनिक विभागाने तब्बल ४० लाख रुपये उधळले असल्याची माहिती समोर आली आहे.

दरम्यान सार्वजनिक बांधकाम विभागाला हा शासकीय निधी कमी खर्च झाला की काय? असं वाटतं असताना, अजून या इमारतीच्या बाहेरील काही कामे करण्यासाठी आणखीन ६० लाख रुपयांची मागणी करण्यात आली आहे. त्यामुळे शासकीय पैशाच्या उधळपट्टीवर नागरिकांनी संताप व्यक्त केला असून, या कामाची चौकशी करून कारवाई करण्याची मागणी केली आहे.