चेतन व्यास, साम टीव्ही

वर्धा : वरुडवरून आर्वी येथे प्रवासी घेऊन जाणाऱ्या वरुड आगाराच्या बसला द्रुगवाडा गावाजवळ भीषण अपघात झालेला आहे. या गावाजवळ असलेल्या टोल नाक्यावरील डिव्हायडरवर भरधाव बस आदळली. यामध्ये बसच्या समोरील भागाचं नुकसान झालं असून प्रवास करणारे सात प्रवासी जखमी झाले आहेत.

बसने वरुडपासून १३ किलोमीटरचे अंतर द्रुगवाडा टोल नाक्यापर्यंत पार केले होते. टोल नाक्याच्या अगदी काही मीटरवर बसचे स्टेअरिंग लॉक झाले. बस सरळ डिव्हायडरवर येऊन आदळली. आवाजामुळे द्रुगवाडा आणि साहूर गावातील नागरिक अपघात पाहण्यासाठी जमा झाले होते. बस क्रमांक एमएच ४० वाय ९१२५ क्रमांकाची बस वरुडवरून आर्वी येथे प्रवासी घेऊन जात होती. या बसमध्ये एकूण सात प्रवासी होते. सातही प्रवासी किरकोळ जखमी झाले असून त्यांना वरुड येथे उपचार करण्यासाठी पाठविण्यात आले. बसचालक डी.एन.राऊत यांनी बस कंट्रोल करण्याचा प्रयत्न केला मात्र स्टेअरिंग लॉक झाल्याने काहीच करता आलं नसल्यानं बस टोल नाक्याच्या दुभाजकावर जाऊन आदळली.

डेपोत गेल्या अनेक वर्षांपूर्वीच्या जुन्या भंगार गाड्या असल्याने ब्रेक फेल होणे किंवा स्टेरिंग लॉक होणे जीवघेणं झालं आहे. भंगार बसेस मुळे नेहमीच अपघात सुरू आहेत. यावेळी वाहक म्हणून एस.एम.बुरे हे सेवेवर होते. अपघात होताच एसटी ड्रायव्हर डी.एन.राऊत यांनी आष्टी पोलीस स्टेशनला कळविले. ठाणेदार राजेश जोशी यांनी तात्काळ घटनास्थळाला भेट देऊन पंचनामा केला असून पुढील तपास सुरू आहे.