चेतन व्यास 
वर्धा : सध्या सुरू असलेल्या आयपीएल क्रिकेट सामन्यावर शहरात लाखो रुपयांचा सट्टा लावला जातो. याबाबत मिळालेल्या माहितीवरून स्थानिक गुन्हे शाखेच्या पथकाने छापा टाकत कारवाई केली आहे. कारवाईत बुकींच्या मुसक्या आवळत तिघांना अटक केली असून त्याच्या ताब्यातून सुमारे २ लाख ६५ हजार ९५० रुपयांचा मुद्देमाल जप्त केला. 

आयपीएल क्रिकेट मॅच सध्या सुरु असून यातील प्रत्येक मॅचवर जोरदार सट्टा चालविला जात आहे. याच प्रमाणे वर्धा शहरात देखील ऑनलाईन सट्टा चालविण्यात येत होता. स्थानिक गुन्हे शाखेचे पथक पुलगाव परिसरात अवैध व्यवसायवर कारवाई करण्यासाठी गस्तीवर होते. दरम्यान, त्यांना प्रफुल्ल पांडे हा त्याचे साथीदारासह भिडी येथील नवीन रेल्वे स्टेशन परिसराजवळील एका शेतात बसून क्रिकेट आयपीएल सामन्यावर मोबाइल फोनच्या माध्यमातून सट्टा लावला जात आहे.

मुद्देमालासह तिघे ताब्यात 

माहिती मिळाल्यानंतर पोलिसांनी येथे छापा टाकत कारवाई केली. याठिकाणाहून प्रफुल्ल रामसेवक पांडे (वय २५), प्रफुल्ल रवींद्र सातपुते (वय ३०), नितीन रतनलाल शाहू (वय ३३) या तिघांना ताब्यात घेतले. तर त्यांच्या ताब्यातून २ हजार ५० रुपयांची रोख, पॉवर बँक, दोन दुचाकी, पाच वेगवेगळे अँड्रॉइड मोबाइल असा २ लाख ६५ हजार ९५० रुपयांचा मुद्देमाल जप्त केला.

आणखी एक जण फरार 
तर ताब्यात घेतलेल्या तिघांनाही आयपीएल जुगाराबाबत विचारणा केली असता त्यांनी त्यांच्या क्षमतेपेशा मोठे जुगाराचे आकडे हे त्यांचा साथीदार अजय ऊर्फ अज्जू तिवारी याच्याकडे देत असल्याची त्यांनी माहिती दिली. चारही आरोपींविरुद्ध देवळी पोलिसांत गुन्हा दाखल केला. ही कारवाई पोलिस निरीक्षक विनोद चौधरी, पोलिस उपनिरीक्षक बालाजी लालपालवाले, पोलिस कर्मचारी गजानन लामसे, चंद्रकांत बुरंगे, भूषण निघोट, मनीष कांबळे, गोपाल बावणकर, अमोल नगराळे यांनी केली.