चेतन व्यास 
वर्धा : सध्याचा जमाना गॅरंटी, वॉरंटीचा. पण, अनेक वस्तूंबाबत गॅरंटी, वॉरंटी मिळत नाही. अशा स्थितीत वर्ध्यात मातीपासून तयार केलेल्या बाप्पांच्या मूर्ती गॅरंटी कार्डसह विक्रीस उपलब्ध आहेत. मागील अकरा वर्षांपासुन वैद्यकीय जनजागृती मंचमार्फत निर्माल्य कुंडात विसर्जित केलेल्या मूर्तिपासुन पुन्हा रिसायकल करून मूर्ती तयार केल्या जातं आहे. इतकेच नाही तर मूर्ती न विरघळल्यास पैसे परत देण्याची हमी देण्यात येत आहे. 

गणेशोत्सव अवघ्या एका दिवसावर आला आहे. यामुळे बाजारात सध्या गणेशाच्या वेगवेगळ्या मूर्ती उपलब्ध आहे. प्रामुख्याने पीओपीपासून तयार केलेल्या आकर्षक अशा गणेश मूर्ती पाहण्यास मिळत आहे. तर अनेक जण मातीपासून मूर्ती तयार करत असतात. असे असले तरी त्याबाबत गॅरंटी मात्र कुणी देताना दिसत नाही. पण, वर्ध्यातील गजानन भांगे हे मूर्तीकार गणेश मूर्तीसोबत गॅरंटी कार्ड म्हणजेच हमीपत्रही देत आहेत. 

पैसे परत करण्याची हमी 

गजानन भांगे यांच्या असलेल्या मूर्ती शंभर टक्के मातीपासूनच तयार केल्या असून त्यामध्ये पीओपी किंवा जलस्त्रोत दुषित करणारा घटक नसल्याची हमी दिली जात आहे. तसं आढळल्यास पैसे परत करण्याची हमीही मूर्तीकार गजानन भांगे देत आहेत. या मातीच्या मूर्ती भाविकांच्याही पसंतीला उतरत आहे. नागरिकही मूर्तीच्या नोंदणीला प्रतिसाद देत असून मुर्त्या कमी पडत आहे. सर्वांनी मातीची मूर्ती वापरावी, असं आवाहन करण्यात आलंय.

मूर्तींचे कृत्रिम कुंडात संकलन 

दरम्यान भांगे यांचा मागील अकरा वर्षांपासून हा उपक्रम सुरू आहे. वर्ध्यातील वैद्यकीय जनजागृती मंचाच्यावतीने शहरातील मूर्तीच कृत्रिम कुंडात संकलन केलं जात. त्यात पीओपीच्या वेगळ्या आणि मातीच्या मूर्ती वेगळ्या कुंडात विसर्जीत करण्याची सुविधा केली जाते.  विसर्जीत होणाऱ्या मूर्तीची माती पुन्हा मूर्तीकारांना मूर्ती तयार करण्यासाठी दिली जाते. यातून पर्यावरण संवर्धनासही हातभार लागत आहेय.