चेतन व्यास

वर्धा : वर्धा जिल्ह्याच्या सेलू (Selu) तालुक्यातील दोघे समुद्रपूर तालुक्यातील जाम चौरस्त्यावर येत गांजा विक्री करीत होते. याचवेळी पोलिसांनी (Police) सापळा रचून त्यांच्यावर छापा मारला. दरम्यान दोन महिलांना अटक करुन १० किलो गांजा जप्त करण्यात आला. (Tajya Batmya)

पोलिसांनी केलेल्‍या कारवाईत पूजा मोहीते (रा. सेवाग्राम) आणि हेमा प्रमोद हमद (रा. जाम) असे अटक केलेल्यांची नावे आहे. तर आरोपी आकाश मोहीते हा फरार झाला आहे. पूजा मोहीते आणि आकाश मोहीते हे दोघे दुचाकीने सेलू येथील शिवनगर परिसरातून जाम चोरस्त्यावर हेमा हमद नामक महिलेला गांजा पोहचवून देणार असल्याची माहिती नार्कोटीक सेलला मिळाली.

त्यानुसार पोलिसांनी रात्रीच्या सुमारास जाम चौरस्ता परिसरात साध्या गणवेशात गस्त लावून सापळा रचत कारवाई केली. ही कारवाई समुद्रपूर पोलिस ठाण्यातील नार्कोटीक सेलच्या वतीने करण्यात आली. यात दोन महिलांना अटक केली असून एक आरोपी फरार होण्यात यशस्वी झाला. आरोपीकडून दहा किलो गांजा, दुचाकी, दोन मोबाईल असा एकूण २ लाख ९५ हजार १२० रुपयांचा मुद्देमाल जप्त केला. याप्रकरणी समुद्रपूर पोलिसात गुन्हा दाखल करण्यात आला.