वर्ध्यातून एक धक्कादायक आणि संतापजनक घटना उघडकीस आली आहे. २८ वर्षीय तरूणानं ७५ वर्षीय वृद्धेवर जबरदस्ती करत अत्याचार केला आहे. महिला झोपडपट्टीत आराम करत असताना आरोपी घरात शिरला. तसेच महिलेवर अत्याचार केला. घटनेनंतर  वृद्ध महिलेने देवळी पोलीस ठाण्यात तक्रार दाखल केली. तक्रारीनुसार तत्काळ गुन्हा दाखल करत आरोपीस अटक करण्यात आलीय.

रोशन चिंधू सहारे (मिरापूर- वय वर्ष २८) असे आरोपीचे नाव आहे. तर, पीडित ७५ वर्षीय वृद्ध महिला वर्धातील देवळी तालुक्यातील वायगाव निपानी येथील रहिवासी आहे. पीडित वृद्ध महिला शहरात भिक्षा मागून पोट भरते. ती एका झोपडीत राहते. घटनेच्या दिवशी वृद्ध महिला झोपडपट्टीत आराम करत होती.

दरम्यान आरोपी रोशन झोपडपट्टीजवळ गेला आणि घराबाहेर थांबला. काही वेळानंतर घरात शिरला आणि पीडित वयोवृद्ध महिलेवर बळजबरीने अत्याचार केला. महिलेनं आरडाओरड केली. मात्र, नराधमानं महिलेला सोडले नाही. त्यानं पीडित महिलेच्या अब्रुचे लचके तोडले.

या घटनेनंतर वृद्ध महिलेनं थेट देवळी पोलीस ठाण्यात धाव घेतली. तसेच पोलिसांसमोर आपबिती सांगितली. पोलिसांनी पीडित महिलेच्या तक्रारीनंतर आरोपीचा शोध घेतला. तसेच आरोपीला अटक केली. या घटनेनंतर परिसरात खळबळ उडाली होती.