चेतन व्यास, साम प्रतिनिधी

एक-दोन महिन्यापूर्वी वर्ध्यातील ड्रग्जच्या मोठे रॅकेटचा पर्दाफाश पोलिसांनी केला होता. आता एका ड्रग्स फॅक्टरीचा पर्दाफाश करण्यात आलाय. वर्ध्यातील कारंजामध्ये DRI महसूल गुप्तचर संचालनालयाने मोठी कारवाई करत ड्रग्सचा कारखाना उद्धवस्त केलाय. महसूल गुप्तचर संचालनालयाच्या पथकाने 'ऑपरेशन हिंटरलँड ब्रू' राबवत जंगलातील एमडी ड्रग्सची निर्मितीचा कारखाना शोधून त्याला उद्धवस्त केलाय. विदर्भातील ही सर्वांत मोठी कारवाई आहे. DRIच्या पथकाने कारखान्यात छापा टाकत तब्बल १२८ किलो मेफेड्रोन (एमडी) जप्त केले आहे.

महसूल गुप्तचर संचालनालयाकडून 'ऑपरेशन हिंटरलँड ब्रू' राबवण्यात येत आहे. त्या अंतर्गत वर्ध्यातील कारंजा येथील ड्रग्जचा कारखाना उद्धवस्त करण्यात आलाय. कारंजा (घाडगे) या तालुक्यातील एका निर्जन जंगल भागात मेफेड्रोनची निर्मिती होत असल्याची गुप्त माहिती महसूल गुप्तचर संचालनालयाच्या अधिकाऱ्यांना मिळाली होती. त्याआधारे अधिकाऱ्यांनी या भागावर पाळत ठेवण्यास सुरुवात केली होती.

अत्यंत घनदाट जंगलाने व्यापलेला आहे ज्यावेळी कारखान्यात एमडी ड्रग्सची निर्मिती सुरू असल्याची खात्री पटल्यानंतर पथकाने तिथे छापा टाकला आणि तब्बल 128 किलो मेफेड्रोन (एमडी) जप्त करण्यात आले. शिवाय 245 किलो कच्चा माल जप्त करण्यात आला आहे. पोलिसांनी तिघांना ताब्यात घेतलंय. सूत्रांच्या माहितीनुसार वैभव उर्फ भय्यु हिरालाल अग्रवाल, सोहम संजय धायगोडे आणी एक अल्पवयीन बालकाला यांना ताब्यात घेतल्याची माहिती आहे.

ऑगस्ट महिन्यात वर्ध्यात ड्रग्ज तस्करीचे मोठे रॅकेट सक्रिय असल्याचे समोर आलं होतं. त्याप्रकरणी पोलिसांनी मुंबईच्या दोन महिलांसह एकूण ५ आरोपींना अटक करण्यात आली होती. या कारवाईत पोलिसांनी तब्बल ४०० ग्रॅम एमडी ड्रग्ज आणि एक पिस्तूल जप्त केले होते. असा एकूण १६ लाख रुपयांचा मुद्देमाल हस्तगत करण्यात आला आहे. नागपूर विभागात ही आतापर्यंतची सर्वात मोठी कारवाई मानली जात होती. वर्धा स्थानिक गुन्हे शाखेला याबाबत माहिती मिळाली होती. मुंबईहून दोन महिला वर्ध्यात ड्रग्जचा पुरवठा करत होत्या.