Walmik karad parli : परळीमध्ये वाल्मीक कराड यांच्या समर्थकांमुळे तणावाचे वातावरण निर्माण झालेय. वाल्मीक कराड याच्यावर खोटे गुन्हे दाखल करण्यात आल्याचा आरोप करत समर्थक आक्रमक झाले. वाल्मीक कराड यांच्या आईने आज सकाळपासून परळी स्टेशनबाहेर ठिय्या आंदोलन केले होते. त्यानंतर परळीमध्ये कराड समर्थकांनी आक्रमक पवित्रा घेत टॉवरवर चढून आंदोलन केले. एकीकडे वाल्मीक कराडला घेऊन सीआयडी न्यायालयात गेली असतानाच दुसरीकडे परळीमध्ये नागरिकांकडून आंदोलन करण्यात येत आहे.

परळीमध्ये कराड समर्थकांनी टॉवरवर चढत आंदोलन केले. आक्रमक झालेल्या समर्थकांनी टायरही पेटवले. पोलिसांनी वेळीच हस्तक्षेप करत टायर विझवले, त्याशिवाय गर्दीवर नियंत्रण मिळवण्याचा प्रयत्न केला. टॉवरवर चढत आंदोलन करताना कराड समर्थकांमधील एक आंदोलक बेशुद्ध पडल्याचे दिसले. वाल्मीक कराड यांच्या आईने परळी शहर पोलीस ठाण्यासमोर ठिय्या दिल्यानंतर, आता पोलीस ठाण्यासमोर हजारोंच्या संख्येने जमाव जमा झाला आहे. त्यांच्याकडून आंदोलन केले जात आहे. त्यामुळे परळमीमध्ये तणावपूर्ण वातावरण आहे.

वाल्मीक कराड यांना न्याय द्या, अशी घोषणाबाजी करत परळीमध्ये कराड समर्थक आक्रमक झाले. कराड समर्थकांनी टॉवरवर चढत आपला रोष व्यक्त केला. परळीतील राणी लक्ष्मीबाई टॉवरवर चढून वाल्मीक कराड समर्थकांनी आंदोलन केले. आंदोलन करताना कराड समर्थकांनी न्याय द्या द्या... अशी घोषणाबाजी केली. वाल्मीक कराड यांच्या आईचे पोलीस ठाण्यासमोर ठिय्या आंदोलन सुरू असताना दुसरीकडे समर्थक टॉवरवर चढून आंदोलन करत आहेत.

केजमधील मस्साजोगचे सरपंच संतोष देशमुख हत्या प्रकरण संपूर्ण राज्यात चर्चेत आहे. आवादा कंपनीच्या वतीने दाखल करण्यात आलेल्या खंडणीच्या गुन्ह्यात वाल्मीक कराडला पोलिसांनी अटक केली आहे. त्याची चौकशी करण्यात येत आहे. कराडला आज केज कोर्टात हजर करण्यात येत आहे. कराडला न्यायालयीन कोठडी मिळणार की जामीन मंजूर होणार, याकडे सर्वांचे लक्ष लागलेय.