Walmik Karad Surrender News: संतोष देशमुख हत्या प्रकरणातील मास्टरमाईंड वाल्मिक कराड अखेर पोलिसांना शरण आलाय. २१ दिवसानंतर वाल्मीक कराड पोलिसांना शरण आलाय. वाल्मीक कराड यानं शरण येण्याआधी एक व्हिडीओ सोशल मीडियावर पोस्ट केला होता. या व्हिडीओत वाल्मिक कराड याने आपल्यावरील सर्व आरोप फेटाळून लावले आहेत. मस्साजोगचे सरपंच संतोष देशमुख यांच्या हत्या प्रकरणात आपला काहीही सहभाग नसल्याचे कराडने सांगितले, त्याशिवाय आपल्यावर खंडणीचा खोटा गुन्हा दाखल केल्याचा दावाही त्याने केलाय.

केजच्या मस्साजोग येथील सरपंच पती संतोष देशमुख यांची ९ डिसेंबर रोजी अपहरण करुन हत्या करण्यात आली होती. या प्रकरणाने राज्यात एकच खळबळ उडाली. हे प्रकरण विधानसभेत तर गाजलेच, बीडमध्ये सर्वपक्षीय मोर्चाही निघाला होता. प्रमुख सूत्रधाराला बेड्या ठोकाव्या, अशी मागणी करण्यासाठी बीडमध्ये मोर्चा निघाला होता. त्यानंतर देवेंद्र फडणवीस यांनाही आक्रमक भूमिका घेतली. हा तपास सीआयकडी देण्यात आला. त्याशिवाय आरोपींची बँक खाती फ्रीज करण्यात आली. अखेर २१ दिवसानंतर वाल्मीक कराड पोलिसांना शरण आला. त्याआधी त्यानं एक व्हिडीओ पोस्ट केला.

व्हिडीओत वाल्मिक कराड काय म्हणाला ?

वाल्मिक कराड याने स्वत: पुण्यात पोलिसांकडे सरेंडर केलं. तत्पूर्वी त्याने एक व्हिडिओ पोस्ट केला आहे. या व्हिडिओमध्ये त्याने आपल्यावरील सर्व आरोप फेटाळले. खंडणी प्रकणाचा आणि माझा काही संबंध नाही. राजकीय द्वेषातून माझं नाव या प्रकरणात गोवलं जात आहे. संतोष देशमुख यांचे जे मारेकरी असतील त्यांना अटक करून फाशीची शिक्षा करण्यात यावी. जर मी या प्रकरणात दोषी आढळलो तर न्याय देवता मला जी शिक्षा देईल ती मला मान्य असेल.

खंडणीच्या आरोपात मी सरेंडर होत आहे. संतोष देशमुख यांच्या हत्येत माझा काहीही सहभाग नाही. जर सहभाग असल्याचे सिद्ध झाल्यास मला फासावर लटकवा, असे वाल्मीक कराड यांनी सरेंडर होण्याआधी म्हटले.

पुण्यातील पाषाण रोड येथील सीआयडी ऑफिसमध्ये मंगळवारी वाल्मिक कराड याने सरेंडर केलं. त्यावेळी पोलीस स्टेशन बाहेर मोठ्या प्रमाणात गर्दी जमली होती. वाल्मीक कराड याचे समर्थकांनी मोठी गर्दी केली होती. त्यावेळी परिसरात एकच गर्दी केल्याने काही काळ तणाव निर्माण झाला होता.