सांगली : सतत पडणारा पाऊस अन् निकृष्ट कामामुळे सांगली (sangli) जिल्ह्यातील बहुतांश गावातील रस्त्याची अक्षरशः चाळण झाली आहे. रस्त्यात खड्डे (potholes) की खड्ड्यात रस्ते अशी रस्ते मार्गाची अवस्था झाली आहे. वाळवा तालुक्यातील इस्लामपूर ते चिकुर्डे या रस्त्यावर वाघवाडी येथील मुख्य चौकातील देखील अशीच अवस्था आहे. याकडे लक्ष वेधण्यासाठी वाघवाडी येथील संतप्त युवक व ग्रामस्थांनी खड्ड्यात चक्क बुजगावणे उभं करून निषेध नाेंदविला आहे. (Sangli Latest Marathi News)

इस्लामपूर ते चिकुर्डे या मार्गावर पुणे बेंगलोर महामार्गाच्या पश्चिमेला असलेल्या व मिनी बाजारपेठ असलेल्या वाघवाडी येथील चौकात रस्त्यात ठिकठिकाणी मोठमोठे खड्डे पडले आहेत. यामुळे वाहनांचे वारंवार अपघात होत आहेत. याच मार्गावर बाजारपेठ वसली असून तालुक्यातील ग्राहकांची या ठिकाणी खरेदीसाठी मोठी गर्दी होत असते.

त्यामुळे या मार्गावरून शालेय विद्यार्थ्यांना वाहनधारकांना कसरत करावी लागते. अनेकदा ग्रामस्थांनी संबंधित खात्याकडे तक्रार करून देखील या प्रश्नाकडे दुर्लक्ष करण्यात आले आहे. त्यामुळे संतप्त ग्रामस्थ व युवकांनी या खड्ड्यात चक्क बुजगावणे उभा करून प्रशासनाचा निषेध नाेंदविला.

Edited By : Siddharth Latkar