राज्याचा अंतरिम अर्थसंकल्प आज अर्थमंत्री अजित पवार यांनी मांडला. अर्थसंकल्पात शेतकरी आणि महिलांना वर्गाला दिलासा देण्याचा प्रयत्न करण्यात आला आहे. दरम्यान यावर विरोधी पक्षांनी निवडणुका डोळ्यासंमोर ठेवून जनतेच्या डोळ्याला पाने पुसण्याचं काम सरकारने केल्याची टीका केली आहे. नाना पटोलेंनी तर हा निवडणुकीच्या जुमल्यांचा अर्थंसंकल्प असून सोमवारपासून आम्ही याचा पोस्टमार्टम करू असं म्हटलं आहे.

शेतकऱ्यांचं कर्ज माफ करावं ही मागणी आमच्या सरकारने केली होती. पण त्यांच्या तोंडाला पानं पुसण्याचं काम यांनी केलं. तरुणांची घोर निराशा झाली आहे. तरुणांना नोकरभरतीमध्ये लुटलं जात आहे. हा पोकळ आणि निवडणुकीच्या जुमल्यांचा अर्थंसंकल्प आहे. आम्ही याचा पोस्टमार्टम सोमवारपासून करणार आहे.

विभागानुसार काहीच तरतुद नाही. तरतुदीचा उल्लेख नाही. आम्ही पुस्तक पाहिले पण त्यातही काही नाही. या मंदिरात हे सरकार जनतेची दिशाभूल करत आहे. जनतेच्या पैश्याची लुट यांनी केली आहे. हा बोगस अर्थसंकल्प आहे. महाविकास आघाडीच्या वतीने या फेकू अर्थसंकल्पाचा विरोध करतो. हे आमची नक्कल करायला निघाले आहेत, पण आम्ही देणारे होतो हे घेणारे आहेत, असा टोला नाना पटोलेंनी लगावला आहे.