आगामी स्थानिक स्वराज्य संस्थांच्या निवडणुका काही महिन्यांतच पार पडतील. सर्वोच्च न्यायालयानं राज्य सरकारला जानेवारी अखेरपर्यंत निवडणुका घेण्याचे आदेश दिले होते. यानंतर राज्यात राजकीय वारे वेगानं वाहू लागले आहेत. फोडाफोडीचं राजकारण सुरू असताना रत्नागिरीत मनसेला धक्का बसला आहे. मनसेचा बडा नेता भाजप पक्षात प्रवेश करणार आहे.

रत्नागिरीत मनसेला मोठं खिंडार पडलं आहे. नेते वैभव खेडेकर यांच्यासह शेकडो मनसे कार्यकर्त्यांनी मनसे पक्षाला सोडचिठ्ठी देण्याचा निर्णय घेतला आहे. उद्या मुंबईतील भाजप कार्यालयात खेडेकर शेकडो मनसे कार्यकर्ते आणि पदाधिकाऱ्यांसह पक्षप्रवेश करणार आहेत. दुपारी तीन वाजता हा पक्षप्रवेश सोहळा पार पडेल.

नरिमन पॉईंट येथील भाजप कार्यालयात भाजपाचे प्रदेशाध्यक्ष रवींद्र चव्हाण यांच्या प्रमुख उपस्थितीत हा पक्षप्रवेश सोहळा पार पडणार आहे. या पक्षप्रवेश सोहळ्यावेळी मंत्री नितेश राणे आणि खासदार नारायण राणे देखील हजर राहण्याची माहिती समोर आली आहे. खेडेकरांसह मनसेचे माजी जिल्हाध्यक्ष, रत्नागिरी शहरातील काही प्रमुख पदाधिकारी, वाहतूक सेनेचे पदाधिकारी यांचाही भाजपमध्ये पक्षप्रवेश होणार आहे.

आज दुपारी चार वाजता मनसेचे पदाधिकारी रत्नागिरीतून जोरदार शक्ती प्रदर्शन करत भाजप प्रवेशासाठी मुंबईच्या दिशेने निघणार आहेत. आज त्यांचा खेडमध्ये मुक्काम असणार आहे. उद्या सकाळी वैभव खेडेकर यांच्यासह सर्व पदाधिकारी मुंबईच्या दिशेने एकत्रित रवाना होणार आहेत.