अंबरनाथ : मालमत्ता व पाणीपट्टी कर न भरणाऱ्यांना विलंब शुल्काची आकारणी केली जात असते. यानंतर देखील अनेक थकबाकीदार कराची थकीत रक्कम भरण्यास तयार नसतात. यासाठी उल्हासनगर पालिकेने थकबाकीदारांना लावलेले विलंब शुल्क शंभर टक्के माफ करण्याचा निर्णय घेतला आहे. यामुळे उल्हासनगरमधील थकबाकीदारांना अभय दिले जाणार आहे. 

उल्हासनगर (Ulhasnagar) पालिका आयुक्त अजीज शेख यांनी मालमत्ता व पाणीपट्टी कर धकबाकीधारकांना दिलासा देण्यासाठी २२ ते २६ जुलैदरम्यान अभय योजना जाहीर केली आहे. या अभय योजनेंतर्गत मालमत्ता व पाणीपट्टी करावरील १०० टक्के विलंब शुल्क माफ होणार असून नागरिकांनी याचा लाभ घेण्याचे आवाहन आयुक्तांनी केले आहे. चारच दिवसासाठी हि अभय योजना असल्याने जे थकबाकीदार या चार दिवसात थकीत कराची रक्कम भरण्यास जातील त्यांना विलंब शुल्क माफी दिली जाणार आहे. 

९३६ कोटींचा थकीत कर 

उल्हासनगरात (Ulhasnagar Municipal Corporation) एकूण एक लाख ८३ हजार १३८ करमूल्य मालमत्ता असून त्यांच्याकडे ९३६ कोटी ९९ लाख ९२ हजार ४९८ रुपयांची थकबाकी आहे. एकूण ९३६ कोटींची थकबाकी वसुलीसाठी महापालिकेने कंबर कसली आहे. गेल्या आठवड्यात थकबाकीधारक १४ मालमत्ताधारकांना नोटिसा देऊन जप्तीचा इशारा देखील दिला होता. त्यांना देखील या अभय योजनेत भाग घेता येणार आहे.