भरत मोहोळकर, साम टीव्ही प्रतिनिधी

उद्धव ठाकरेंच्या सभास्थळी राडा झाल्यावरून राजकारण तापलंय. त्यातच आता मुख्यमंत्री एकनाथ शिंदे राज ठाकरेंसाठी तर जितेंद्र आव्हाड उद्धव ठाकरेंसाठी मैदानात उतरलेत. त्यावरचा हा खास रिपोर्ट....

राज ठाकरेंच्या गाडीवर ठाकरे गटाच्या कार्यकर्त्यांनी सुपाऱ्या फेकल्या आणि राज ठाकरेंनी उद्धव ठाकरे आणि शरद पवारांना थेट इशाराच दिलाय. त्यानंतर उद्धव ठाकरेंच्या ताफ्यावर ठाण्यातील सभास्थळी मनसे कार्यकर्त्यांनी शेण, टोमॅटो आणि नारळ फेकले आणि ठाकरे विरुद्ध ठाकरे संघर्ष आणखीच टोकाला गेला. त्यातच अॅक्शनला रिअॅक्शन असते,असं म्हणत मुख्यमंत्री एकनाथ शिंदे राज ठाकरेंसाठी मैदानात उतरले. तर 2 महिने थांबा अॅक्शनला रिअॅक्शन काय असते दाखवतो, असा इशाराच संजय राऊतांनी दिलाय.

एकीकडे मुख्यमंत्री एकनाथ शिंदे राज ठाकरेंसाठी तर दुसरीकडे जितेंद्र आव्हाड उद्धव ठाकरेंसाठी मैदानात उतरलेत. राज ठाकरे आणि उद्धव ठाकरेंचे कार्यकर्ते आपसात अनेकदा भिडले मात्र थेट नेत्यांना कधीच टार्गेट केलं गेलं नाही. बीडमधल्या सुपाऱ्या आणि ठाण्यातील राडा यामुळे राजकारण मात्र चांगलंच पेटलंय. आता हा वाद शमवण्यासाठी ठाकरे बंधूंनी आपापल्या कार्यकर्त्यांना समजावून महाराष्ट्राची राजकीय परंपरा जपायला हवी. अन्यथा महाराष्ट्राचा बिहार व्हायला वेळ लागणार नाही.