विनय म्हात्रे, मुंबई|ता. १६ जानेवारी २०२४

Shivsena Thackeray Group Press Conference:

मुंबईतील वरळी एनएससीआय डोम येथे ठाकरे गटाची महापत्रकार परिषद सुरू आहे. या पत्रकार परिषदेत सर्वात मोठा खुलासा झाला असून विधानसभा अध्यक्ष राहुल नार्वेकर यांनी १९९९चीच घटना शेवटची आहे, असे मानत जो निकाल दिला होता, तो दावाच आता खोडून काढला आहे. या पत्रकार परिषदेत शिवसेनेची २०१३ ला राष्ट्रीय कार्यकारिणीची बैठक आयोजित केली होती. त्या बैठकीचा व्हिडिओच आता ठाकरे गटाने सादर केला आहे. तसेच ठाकरे गटाने २०१८ मधील राष्ट्रीय कार्यकारिणीचाही व्हिडिओ सादर केला.

काय आहे ठाकरे गटाचा दावा...

विधानसभा अध्यक्ष राहुल नार्वेकर (Rahul Narvekar) यांनी शिवसेना संघर्षाचा निकाल देताना १९९९ चीच घटना शेवटची आहे, त्यानंतर पक्षघटनाच तयार झाली नाही, असा दावा केला होता. तो दावाच आता ठाकरे गटाने खोडून काढला आहे. ठाकरे गटाने आजच्या पत्रकार परिषदेत स्क्रिनवर 2013ची राष्ट्रीय कार्यकारिणीचा बैठकीचा व्हिडिओचं सादर केला.

विशेष म्हणजे या सभेत स्वत: विधानसभा अध्यक्ष राहुल नार्वेकरही उपस्थित होते. या बैठकीत सुभाष देसाई यांनी ठराव मांडला. त्यांच्या ठरावाला मनोहर जोशी यांनी अनुमोद दिले. तसेच लिलाधर डाके यांनीही अनुमोदन दिले. या बैठकीत सध्या शिंदे गटात असलेले रामदास कदम यांनी शिवसेना पक्षप्रमुख पद निर्माण करण्याचा ठराव मांडला होता.

 ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

२०१८ चाही व्हिडिओ समोर आला!

तसेच या वेळी ठाकरे गटाने २०१८ मध्ये झालेल्या राष्ट्रीय कार्यकारिणी झाली, त्याचाही व्हिडिओ सादर केला. या कार्यकारणीत निवडणूक प्रक्रिया राबवली गेली. यामध्ये शिवसेना पक्षप्रमुखपदासाठी आलेल्या एकाच अर्जानुसार उद्धव बाळासाहेब ठाकरे पक्षप्रमुख म्हणून निवडून आले आहेत, असे जाहीर करण्यात आले. यावेळी स्वतः मुख्यमंत्री एकनाथ शिंदेही (Eknath Shinde) हजर असल्याचे त्या व्हिडिओमध्ये स्पष्ट दिसत आहे. (Latest Marathi News)