ठाकरे बंधू एकत्र आल्यानंतर महापालिका निवडणुकीसाठी दोन्ही पक्षांचा फॉर्म्युला समोर आलाय..युतीमध्ये दोन्ही पक्ष किती जागा लढवणार? पाहूयात स्पेशल रिपोर्टमधून....

महापालिकेसाठी ठाकरे सेनेचा मविआला रामराम?

स्थानिक स्वराज्य संस्था निवडणुकीसाठी सगळ्याच पक्षांनी कंबर कसली आहे. मराठीच्या मुद्यावरुन एकत्र आलेल्या ठाकरे बंधूंची युती कधी होणार? याकडे संपूर्ण महाराष्ट्राचं लक्ष लागलं आहे. उद्धव ठाकरे आणि राज ठाकरे एकमेकांची भेट घेत असले तरी दोन्ही पक्षांच्या युतीची अधिकृत घोषणा झाली नाही. मात्र दोन्ही बंधूंमध्ये जागावाटपावरून चर्चा झाली आहे. याचं चर्चेतून निवडणुकीसाठी फॉर्म्युला ठरल्याची माहिती सूत्रांनी दिली आहे...

ठाकरे बंधूंमध्ये मुंबई महापालिकेसाठी 50-50 चा फॉर्म्युला ठरलाय. मुंबई वगळता ठाणे, कल्याण- डोंबिवली, पुणे, छत्रपती संभाजीनगर महापालिकेत 60-40 चा फॉर्म्युला असेल. त्यात ठाकरेसेनेला 60 टक्के तर 40 टक्के जागा मनसेला मिळण्याची शक्यता आहे. महापालिका निवडणुकीत ठाकरे सेना महाविकास आघाडीतून बाहेर पडण्याची शक्यता आहे.

मुंबई महापालिकेत ठाकरे बंधूंनी एकत्र निव़डणूक लढवल्यास मराठी बहुल मतदारसंघात निश्चितच त्यांना फायदा होईल.

माहिम, भांडुप, विक्रोळी, विलेपार्ले आणि शिवडी विधानसभा मतदारसंघात मराठी मते जास्त आहेत. या पाच विधानसभा मतदारसंघात दोन्ही ठाकरे एकत्र आल्यास मराठी मतांचा त्यांना फायदा होण्याची शक्यता आहे.

दरम्यान दोन्ही पक्षांकडून स्वतंत्रपणे महापालिका क्षेत्रात आढावा बैठका घेतल्या जातायत. या आढावा बैठकीनंतर ठाकरे बंधूंमध्ये स्वतंत्र बैठक होईल आणि मग कोणी किती जागा लढवणार, हे समोर येईल. दरम्यान दसरा मेळाव्यात किंवा दिवाळीच्या आसपास युतीची अधिकृत घोषणा केली जाऊ शकते. युतीच्या घोषणेनंतरच जागा वाटपाचा अधिकृतरित्या फॉर्म्युलाही समोर येईल. दोन्ही पक्षांतील नेते आणि कार्यकर्तेही युतीसाठी उत्सुक आहेत. ठाणे, कल्याण, नाशिकमध्ये तर दोन्ही पक्षाचे कार्यकर्ते एकत्रितरीत्या आंदोलनही करतायेत. त्यामुळे आगामी निवडणुकीत महायुतीसमोर आव्हान उभ राहाणार आहे हे निश्चित...