Akola News: अकोल्यातून अपघाताचं वृत्त हाती आलं आहे. अकोल्यातील राष्ट्रीय महामार्गावर दोन तरुणांचा भीषण अपघातात जागीच मृत्यू झाला आहे. टँकर-दुचाकीचा हा भीषण अपघात झाला आहे. मूर्तिजापूर ग्रामीण पोलीस स्टेशनच्या हद्दीत हा भीषण अपघात झाला आहे. हा अपघात शुक्रवारी सायंकाळी घडला आहे. (Latest Marathi News)

सुत्रांनी दिलेल्या माहितीनुसार, अकोला जिल्ह्यातील मूर्तिजापूर तालुक्यातील अनभोरा येथील दुचाकीस्वार राष्ट्रपाल क्षीरसागर (वय 27) आणि मोहन खंडारे (वय 25) हे आपल्या दुचाकीवरुन गावी अनभोरा येथे जात होते. दरम्यान, विरूद्ध दिशेने येणाऱ्या टँकरची दुचाकीला धडक लागली. या अपघातात दुचाकीस्वार राष्ट्रपाल क्षीरसागर आणि मोहन खंडारे या दोघांचा जागीच मृत्यू झाला.

घटनेची माहिती मिळताच बोरगाव मंजू पोलिस स्टेशनचे दुय्यम ठाणेदार पुरुषोत्तम ठाकरे, हेडकॉन्स्टेबल दीपक कानडे, योगेश काटकर,अभिजीत असलमोल, संजय सैतवाल यांनी घटनास्थळी धाव घेतली.

या दोघांच्या मृतदेहाचा पंचनामा करून मृतदेह उत्तरीय तपासणीसाठी मूर्तिजापूर येथील शासकीय रुग्णालयात पाठविले आहेत. कुटुंबातील दोन तरुणांचा मृत्यू झाल्याने त्यांच्या कुटुंबावर मोठा आघात बसला आहे. दोघांच्या मृत्यूने गावात शोककळा पसरली आहे.

बीडमध्ये भीषण अपघात, दोन डॉक्टरांचा जागीच मृत्यू

दरम्यान, बीडमध्ये अपघातात अंबोजोगाई शहराजवळील चनई परिसरात शुक्रवारी दुपारच्या सुमारास भीषण अपघात झाला. या भीषण अपघातात दोन डॉक्टरांचा मृत्यू झाला . धारूरहून चनई परिसरातून अंबाजोगाईकडे येताना त्यांची कार एका झाडावर आदळली. त्यात दोघांचा जागीच मृत्यू झाला.

या अपघातात घटनास्थळावरून मिळालेल्या माहितीनुसार, आज दुपारी एकच्या सुमारास धारूहून चनई परिसरातून अंबाजोगाईच्या दिशेने एक भरधाव कार निघाली होती. त्याचवेळी या दोन डॉक्टरांची कार झाडावर आदळली.

मात्र, जोरात झाडाला आदळल्याने दोन्ही डॉक्टरांचा जागीच मृत्यू झाला. त्यानंतर परिसरातील नागरिकांनी कारच्या दिशेने धाव घेतली.कारचा पुढच्या काचांचा चक्काचूर झाला होता. अपघात झाल्यानंतर उपस्थित नागरिकांनी या अपघाताची माहिती पोलिसांना कळविली.