>> नवनीत तापडिया

औरंगाबाद : वातावरणातील बदलामुळे अनेक वेळी पीकांवर वेगवेगळे रोग येतात आणि यामुळे शेतकऱ्यांना मोठं आर्थिक नुकसानीचा सामना करावा लागतो. मात्र तुमच्या पिकांवर कोणता रोग येणार आहे, हे तुम्हाला आधीच कळाले तर? तुमचा यावर विश्वास बसणार नाही, पण औरंगाबाद शहरातील दोन सख्ख्या भावांनी शेतातील पिकांचे भविष्य सांगणारे 'खेती ज्योतिष' नावाचं डिव्हाईस तयार केलंय. यामुळे याचा मोठा फायदा शेतकऱ्यांना होणार आहे.

आतापर्यंत आपण माणसांचे हात बघून भविष्य सांगणारे अनेक ज्योतिषी बघितले असतील. मात्र औरंगाबादच्या समीर पितळे आणि प्रतीक पितळे या सख्ख्या बंधूंनी काही वेगळाच प्रयोग केलाय. कारण त्यांनी तयार केलेल्या ‘खेती ज्योतिष’ डिव्हाईस चक्क शेतातील पिकांचे भविष्य सांगतो. शेताच्या मध्यभागी लावलेल्या या डिव्हाईसवर सुमारे 5 एकर जमिनीचा विविध 16 मुद्यांच्या आधारे डेटा जमा केला जातो. या डेटाच्या आधारावर पिकांवर कोणते रोग येऊ शकतो याचा अंदाज लावता येतो.

विशेष म्हणजे पितळे बंधूंनी तयार केलेले हे 'खेती ज्योतिष' डिव्हाईस सौरऊर्जेवर चालतो. या डिव्हाईसमध्ये सीमकार्ड असून ते इंटरनेटला जोडलं आहे. यामुळे शेताचे तापमान, मातीचा ओलावा, वाऱ्याची दिशा व वेग, सूर्य प्रकाश, पाऊस किती झाला, दवबिंदू, धुके आदी माहिती एका ठिकाणी जमा होते. याच माहितीच्या आधारे शेतकरी आपल्या शेतातील पिकांवरील रोगराईचा अंदाज लावू शकतो.

एकीकडे अतिवृष्टीने परेशान असलेल्या शेतकऱ्यांना या 'खेती ज्योतिष' या डिव्हाईसमुळे नक्कीच शेतकऱ्यांना आपले उत्पन्न वाढविण्यास मदत होणार हे नक्की.

डिव्हाईसचा असा होणार फायदा

>> खेती ज्योतिष नावाचा डिव्हाईस पीकांचे भविष्य सांगणारं.

>> पीकांवर कोणता रोग येणार याची आधीच माहिती मिळणार.

>> पीकांचा डेटा आता एका क्लिकवर उपलब्ध होणार.

>> प्रत्येक दोन मिनिटाला ‘क्लाऊड’वर माहिती पाठविली जाऊ शकते.

>> वेगळ्या विजेच्या कनेक्शनची गरज नाही.

>> शेतकऱ्यांना शास्त्रशुद्ध माहिती मिळाल्यास याचा फायदा

>> आधीच माहिती मिळाल्यास योग्य वेळी फवारणी करून शेतकरी नुकसान टाळू शकणार