नगरपालिका, महापालिका आणि जिल्हा परिषद निवडणुकाही झाल्या. मात्र त्यानंतरही राज्यातील सामाजिक धृवीकरणाचं राजकारण काही थांबण्याचं नाव घेत नाही. या धृवीकरणाच्या राजकारणाला कारण ठरलंय टिपू सुलतान यांच्या मालेगाव महापालिकेच्या उपमहापौरांच्या दालनात लावलेल्या फोटोचं. हा फोटो मालेगाव महापालिका प्रशासनानं काढला. मात्र आता हा फोटो पुन्हा लावण्यात येणार असल्याचा निर्धारच मालेगाव महापालिकेच्या उपमहापौर शान ए हिंद यांनी केलाय.

याच वादात उडी घेत प्रकाश आंबेडकरांनीही महाराष्ट्राची वाटचाल गोध्राच्या दिशेनं सुरु असल्याचा दावा केलाय. खरंतर निवडणूक काळात मुलभूत प्रश्नांना फाटा देत धार्मिक धृवीकरणावरच निवडणुकीचा आखाडा रंगला. मात्र निवडणुकीनंतर आता मालेगाव महापालिकेच्या उपमहापौर शान ए हिंद यांनी आपल्या दालनात टिपू सुलतानचा फोटो लावला आणि तिथूनच वादाची ठिणगी पडली.

त्यातच काँग्रेसचे प्रदेशाध्यक्ष हर्षवर्धन सपकाळांनी टिपू सुलतान आणि छत्रपती शिवाजी महाराजांचं शौर्य समकक्ष असल्याचं म्हटलं आणि तिथूनच या वादाचा भडका उडाला. सपकाळांनी टिपू सुलतान यांच्याबद्दल वक्तव्य केल्यानंतर भाजपनं राज्यभर निषेध आंदोलन केलं. एवढंच नाही तर पुण्यात तर थेट काँग्रेसच्या कार्यालयावरच भाजप कार्यकर्त्यांनी दगडफेक केल्याचंही समोर आलंय.

टिपू सुलतानच्या वादात धार्मिक धृवीकरणाची संधी दिसल्यानं भाजप आमदार गोपिचंद पडळकरांनीही यात उडी घेत सपकाळांना फाशी देण्याची मागणी केलीय. राज्यात अनेक महत्वाचे प्रश्न आहेत.अमेरिकेसोबतच्या व्यापार करारानंतर सोयाबीन, कापसाचे भाव पडलेत. शेतकरी आत्महत्या वाढत चालल्या आहेत. बेरोजगारी वाढत चाललीय. मुलभूत समस्या सुटलेल्या नसताना व्होटबँकेसाठी धार्मिक धृवीकरणाचं राजकारण सुरुय का? असा प्रश्न निर्माण झालाय. त्यामुळे विकासाऐवजी धृवीकरणाचं राजकारण होत राहिलं तर पुरोगामी महाराष्ट्राची घसरण गायपट्यातील राज्यांच्या पातळीवर झाल्याशिवाय राहणार नाही.