Sangli News : पार्टीनंतर पोहोयला गेलेल्या सहायक पोलिस उपनिरीक्षकाचा शेततळ्यात बुडून मृत्यू झाल्याची घटना सांगली (sangli) जिल्ह्यात घडल्याचे समाेर आले आहे. मिरज तालुक्यातील सोनी येथे ही घटना घडली आहे. होमगार्ड चालकांची परिक्षा घेण्यासाठी गेलेल्या सहायक पाेलिस उपनिरीक्षकचा घटनेत दुर्देवी मृत्यू झाला आहे. (Maharashtra News)

या घटनेबाबत मिळालेली माहिती अशी : भोसे येथे सांगली होमगार्ड चालकांची परिक्षा होती. या परिक्षेसाठी सांगली पोलिस मुख्यालयातील मोटार परिवहन विभागात कार्यरत सहायक पोलिस उपनिरीक्षक तिम्बती आवळे आणि त्यांच्या सहकार्‍यांची नियुक्ती करण्यात आली होती. होमगार्ड चालकांची परिक्षा झाल्यानंतर तिम्बती आवळे हे सहकारी विनायक कांबळे यांच्या घरी जेवणाच्या पार्टीसाठी गेले होते.

या पार्टीनंतर दोघेही शेततळ्यात पोहण्यासाठी उतरले. परंतु पोहत असताना तिम्बती आवळे हे शेततळ्यात बुडाल्याने त्यांचा मृत्यू झाला. पाण्यात दम लागल्याने ते बुडाले असावेत असा पोलिसांचा प्राथमिक अंदाज आहे. दरम्यान या घटनेनंतर सांगली पाेलिस दलात शाेककळा पसरली आहे.

Edited By : Siddharth Latkar