भुषण अहिरे, साम टीव्ही

धुळ्यातील शिरपूर शहरातील जैन गल्लीत ३ मजली इमारत पत्त्याच्या बंगल्यासारखी कोसळली आहे. सुदैवानं या इमारतीत एकही कुटुंब राहत नव्हते. त्यामुळे जीवितहानी टळली. इमारतीत राहणारे कुटुंब एक दिवस आधीच स्थलांतरित झाले होते. इमारत कोसळतानाचा व्हिडिओ सध्या सोशल मीडियात व्हायरल होत आहे.

इमारतीला लागून जैन समाज मंगल कार्यालयाचे बांधकाम सुरू होते. बिल्डींगला लागून जूने घर होते. ते जुने घर आधी पाडण्यात आले आणि त्यामुळे इमारतीच्या एका बाजूचा आधार काढल्याने इमारत कोसळण्याची शक्यता होती. नंतर इमारत आधी खाली करण्यात आली. त्यातील रहिवाश्यांना स्थलांतरित करण्यात आले.

इमारतीतील रहिवाशांनी बिल्डींग खाली केल्यानंतर इमारत अचानक कोसळली. इमारतीत कुणीही नसल्याने मोठा अनर्थ टळला. इमारत कोसळल्यानंतर यात जीवितहानी झालेली नाही. इमारत कोसळतानाचा व्हिडिओ सध्या सोशल मीडियात व्हायरल होत आहे. ज्यापद्धतीनं पत्त्याचा बंगला कोसळतो. त्याच पद्धतीनं ही इमारत जमीनदोस्त झाली आहे.

भरत केशवलाल जैन यांच्या मालकीची वडिलोपार्जित ही इमारत होती. इमारत कोसळल्यानंतर परिसरात भीतीचे वातावरण निर्माण झाले होते. स्थानिक प्रशासनाला या घटनेची माहिती मिळाल्यानंतर स्थानिक प्रशासनाने घटनास्थळी धाव घेतली.