महापालिका निवडणुकीचं बिगुल वाजलं आणि ठाकरे बंधूंच्या युतीच्या चर्चांना वेग आला...ठाकरे बंधूंमध्ये युतीचं ठरलं असलं तरी काही जागांवरून मात्र घोडं अडल्याचं दिसतंय. दोन्ही भावांमध्ये अनेक बैठका झाल्या मात्र तरीही काही जागांवरील तिढा सुटायला तयार नाही. मुंबईतल्या विक्रोळी विधानसभा मतदारसंघासह मराठीबहुल शिवडी आणि माहिमधल्या जागांवरून पेच निर्माण झालाय.

माहिम विधानसभा मतदारसंघातील वॉर्ड क्रमांक 190,192,194 मध्ये दोन्ही पक्षात रस्सीखेच आहे... तर शिवडी विधानसभेतही वॉर्ड क्रमांक 203, 204, 205 मध्येही ठाकरेसेना आणि मनसेत तिढा आहे...

दुसरीकडे दोन्ही पक्षांच्या संयुक्त बैठकीत जागावाटपाचा पेच न सुटल्यानं दोन्ही पक्षांचे प्रमुख स्वतः जागावाटपावरून अंतिम निर्णय घेणार आहेत...यासाठी राज ठाकरे आणि उद्धव ठाकरे बैठक घेऊन पुढील रणनिती ठरवतील..

मनसे आणि ठाकरेसेनेच्या युतीची घोषणा झाल्यावर ठाकरेबंधूंकडून मुंबईतच नव्हे, तर ठाणे, कल्याण-डोंबिवली, नाशिक, पुणे आणि राज्यातील इतर भागातही संयुक्त सभांचं आयोजन केलं जाणार आहे.... त्यामुळे जागावाटपाचा तिढा कधी सुटणार? मराठी माणसासाठी एकत्र आलेल्या ठाकरेबंधूंना मराठी मताची मोट बांधणं शक्य होणार का? जागावाटपाचं गणित कसं जुळवणार? हे पाहणं महत्त्वाचं ठरणार आहे...