भाजपचे माजी खासदार सुजय विखे पाटील यांनी शिर्डीतील भिक्षेकरी आणि प्रसादलयावरून केलेल्या वक्तव्यामुळे मोठा वादंग निर्माण झाला. शिर्डीत मोफत जेवणाची व्यवस्था होत असल्यानं राज्यभरातून भिकारी शिर्डीत गोळा होत असतात, असं सुजय विखे म्हणाले होते. याच विधानावर विरोधक आणि भिक्षेकरांनी टीकेची झोड उठवली होती. मात्र, शिर्डीत खऱ्या भिक्षेकऱ्यांची संख्या मोजकीच असून, अनेकांनी शिर्डीत भिक्षा मागणे हा व्यवसाय बनवला असल्याची माहिती समोर आलीय.

सुजय विखे पाटील यांनी केलेल्या वक्तव्यावर विरोधक तसेच साईभक्तांनी आगपाखड केली. त्यांनी केलेल्या वक्तव्यावर सुजय विखे पाटील यांनी स्पष्टीकरण दिलंय. 'साईभक्तांना हिणवण्याचा प्रयत्न कुणीही केलेला नाही. साईभक्त आदरणीयच आहेत. पण किती गुन्हेगार भिकाऱ्यांचा सोंग घेऊन तिथे आले आहेत, याची आकडेवारी लवकरच मी जाहीर करेन. प्रसादातून १० रूपये घेतल्यानंतर जी काही रकमेची बजत होईल. त्याचा उपयोग मुलांच्या शिक्षणासाठी करण्यात यावा ही माझी अपेक्षा आहे, आणि या भूमिकेवर मी ठाम आहे, असं सुजय विखे म्हणाले.

शिर्डीत खऱ्या भिक्षेकऱ्यांची संख्या मोजकीच असल्याची माहिती समोर आली आहे. अनेकांनी शिर्डीत भिक्षा मागणे हा व्यवसाय बनवलाय. गेल्या तीन वर्षात शिर्डी पोलिसांनी तब्बल चार हजारांच्या आसपास पुरुष आणि महिला भिक्षेकऱ्यांना ताब्यात घेत, सुधारगृहात पाठवल्याची माहिती आहे. शिर्डीत जवळपास ४०० ते ५०० भिक्षेकरी साई मंदिराच्या परिसरात भिक्षा मागत असतात. तसेच भिक्षा दिली नाही तर, लोकांसोबत वाद आणि शिवीगाळ केल्याच्या घटना देखील घडलेल्या आहेत.

सुजय विखे यांच्या विधानानंतर शिर्डीमध्ये राज्यभरातून मोठ्या प्रमाणात गोळा झालेले भिक्षेकरी, त्यातून साईभक्तांना होणारा त्रास, वाढती नशेखोरी आणि गुन्हेगारी हा ज्वलंत मुद्दा ऐरणीवर आलाय. सामाजिक न्याय विभाग आणि शिर्डी पोलिस याबाबत काय उपाययोजना आखतात, हे बघणं आता महत्त्वाचं ठरणार आहे.