सचिन बनसोडे, साम टीव्ही

अमेरिकेचे राष्ट्राध्यक्ष डोनाल्ड ट्रम्प यांच्या धोरणांमुळे भारतातील क्रूड ऑइलच्या पुरवठ्यावर परिणाम झाला आणि त्याचा थेट फटका नगर-मनमाड महामार्गाच्या कामाला बसला असा दावा भाजपचे माजी खासदार सुजय विखे पाटील यांनी केला आहे. शिर्डी येथे बोलताना विखे पाटील यांनी ट्रम्प यांच्यावर जोरदार टीका करत काल केलेल्या विधानाचा पुरुच्चार केला.

मी अगोदरही बोललो आहे, असा वेडा माणूस देशाचे नेतृत्व करतो? असा सवाल सुजय विखे पाटील यांनी केला. इराणवरील हल्ल्यामुळे भारतातील क्रूड ऑइलचा पुरवठा बंद झाला किंवा त्यात मोठी घट झाली, असा दावा त्यांनी केला. क्रूड ऑइलच्या पुरवठ्यात सुमारे 50 टक्के घट झाल्याने पेट्रोल-डिझेल निर्मितीनंतर मिळणाऱ्या डंबराच्या उत्पादनावरही परिणाम झाला, असे ते म्हणाले. डांबरचा पुरवठा कमी झाल्याने नगर-मनमाड महामार्गाच्या कामावर परिणाम झाल्याचे विखे पाटील यांनी सांगितले. ही मोठी लिंक आहे आणि म्हणून याला ट्रम्प जबाबदार आहेत. असे ते म्हणाले. जो माणूस सकाळी एक आणि दुसऱ्या दिवशी एक बोलतो, कधी म्हणतो युद्ध संपलं आणि लगेच दुसऱ्या दिवशी मिसाईल टाकले जातात, अशी टीका त्यांनी केली.

ट्रम्प यांच्या वक्तव्यांमुळे भारतातील नागरिकांवरही वेगवेगळे परिणाम झाल्याचे सांगताना मिश्कील टिप्पणी केली. जे दारू पितात त्यांची दारू पिण्याची क्षमता वाढली. त्यांना कळेना हा वेडा काय म्हणतोय आणि काय नाही. मिसाईल पडली की ते पुन्हा प्यायला सुरू करतात, असे अजब विधान त्यांनी केले. सुजय विखे पाटील यांच्या या वक्तव्यामुळे राजकीय वर्तुळात पुन्हा एकदा चर्चा रंगण्याची शक्यता आहे.