-- अविनाश कानडजे

औरंगाबाद : औरंगाबाद मधील आडगाव बुद्रुक येथील स्पर्धा परीक्षेची तयारी करणाऱ्या तरुणाने गळफास घेऊन आत्महत्या केल्याची घटना घडली आहे. मृत वैभवचे बीएस्सी पदवीचे शिक्षण पूर्ण झाले असून, तो स्पर्धा परीक्षेची तयारी करत होता. घटनेच्या वेळी त्याचे वडील कंपनीमध्ये गेले होते. तर, आई घर कामात व्यस्त होती.

हे देखील पहा :

याच वेळेस वैभव अभ्यास करण्यासाठी आपल्या खोलीत गेला. बराच वेळ झाला तरी वैभव बाहेर आला नसल्याने आईने आवाज दिला. मात्र प्रतिसाद मिळाला नाही. आईने अनेक वेळा आवाज देऊनही आतून कोणताच प्रतिसाद येत नसल्याने अखेर त्यांनी शेजारील राहिवाश्यांच्या मदतीने दरवाजा तोडला असता त्याने गळफास घेतल्याचे दिसून आले.

दरम्यान, त्याला खासगी रुग्णालयात दाखल करण्यात आले. पण, तोपर्यंत वैभवची प्राणज्योत मालवली होती. त्याने आत्महत्या का केली हे स्पष्ट होऊ शकले नाही. या घटनेची चिकलठाणा पोलिस ठाण्यात अकस्मात मृत्यूची नोंद करण्यात आली आहे. त्याने आत्महत्या का केली? त्याच्या मागे नेमके काय कारण आहे? याचा तपास चालू असल्याची माहिती पोलिसांनी दिली.

Edited By : Krushnarav Sathe