प्रहार जनशक्ती पक्षाचे संस्थापक आणि अचलपूरचे आमदार बच्चू कडू सतत चर्चेतील व्यक्तीमत्व आहे. लोकसभा निवडणुकीतही महायुती विरोधात उमेदवार देऊन त्यांनी सत्ताधाऱ्यांशी संघर्ष छेडला. लोकसभेचा धुरळा शांत होत नाही तर पुन्हा अमरावतीतलं राजकीय वातावरण तापलंय.

आक्रमक बच्चू कडू पुन्हा एकदा चर्चेत आलेत ते कुठल्या अभिनव आंदोलनामुळे नव्हे तर त्यांना आलेल्या धमकीमुळे...अचलपूर परीसरात दुचाकीवर तोंडाला रुमाल बांधून आलेल्या एका व्यक्तीनं एका भाजीविक्रेत्याशी बोलताना कडूंना संपवण्याची भाषा केली. तर दुस-या एक घटनेत चांदुरबाजार इथं एका हॉटेलमध्ये तीन व्यक्तींनी 'आज मौका देख के कडू को चौका मारेंगे', असं व्यक्तव्य केलंय. बच्चू कडूंनी या प्रसंगाचा उल्लेख करुन जिवाला धोका असल्याबाबत पोलिस अधिक्षकांना पत्र लिहिलं आहे.

दरम्यान, आपला अपघात झाल्याची अफवा पसरवली जात असल्याचीही तक्रार बच्चू कडूंनी या पत्रातून केली आहे. भाजी विक्रेत्याशी बोलताना धमकी देणाऱ्यांनं म्हटलं आहे की, ''मी शिंदे साहेबांचा कट्टर कार्यकर्ता आहे. मी गडचिरोली येथे राहत असून नक्षलवाद्यांशी माझे नजिकचे संबंध आहेत. बच्चू कडूला पाहून घेवू. जसे बाळासाहेब ठाकरे यांनी दिघेला संपविले तसंच शिंदे साहेब बच्चू कडूला संपवणार. नाहीतर मीच स्वतः बच्चू कडूला संपवणार. बच्चू कडू म्हणजे काहीच नाही. बच्चू कडुला पाहून घेऊ.''

असं वक्तव्य करुन अज्ञात व्यक्तीनं खिशातून मोबाईल काढून मुख्यमंत्री आणि मंत्र्यांसमवेतचे फोटो दाखवत या सर्वांचा माझ्या डोक्यावर हात असल्याचं म्हटलंय. दुसरीकडे चांदूर बाजारमध्ये एका हॉटेल मध्ये तीन व्यक्तींमध्ये 'आज मौका देख के कडू को चौका मारेंगे' असा संवाद झाल्याची तक्रार कडूंनी केली आहे.

मे महिन्यात प्रचारादरम्यान प्रहारचे लोकसभेचे उमेदवार दिनेश बुब यांच्या घरासमोर अज्ञात व्यक्तींनी त्यांच्या कारच्या काचा फोडल्या होत्या. आता बच्चू कडू यांना धमकी मिळत असल्यांनं प्रहारचे कार्यकर्ते अस्वस्थ झाले आहेत. आगामी विधानसभा निवडणुकीच्या पार्श्वभूमिवर हा प्रकार गंभीर आहे. पोलिस या धमकीच्या मुळाशी जाऊन काय शोधून काढतात ते पाहणं महत्वाचं आहे.