माय - लेकाच्या नात्याला काळिमा फासणारी घटना धुळ्यातून समोर येत आहे. केवळ मासे कुत्र्याने खाल्ल्याच्या क्षुल्लक कारणावरून एका २५ वर्षीय तरुणाने आपल्याच सख्ख्या आईचा लाकडी दांडक्याने मारहाण करत जीव घेतला आहे. तसेच जीव घेतल्यानंतर मुलाने घटनास्थळावरून पलायन केलं आहे. पोलिसांना याची माहिती देण्यात आली असून, पुढील तपास पोलिसांकडून सुरू आहे.

ही संतापजक घटना धुळ्यातील शिरपूरच्या थाळनेर येथील वाठोडे गावात घडली. टिपाबाई रेबला पावरा (वय वर्ष ६७) असे मृत महिलेचे नाव आहे. तर आवलेस रेबला पावरा (वय वर्ष २५) असे नराधम मुलाचे नाव आहे. मिळालेल्या माहितीनुसार, घटनेच्या दिवशी मृत महिलेनं घरात जेवणाला मासे तयार केले होते. मासे कुत्र्याने खाल्ले.

याच कारणामुळे तरूणाला संताप अनावर झाला. त्याने थेट आईवर लाकडी काठीने हल्ला केला. लाकडी काठीने मारहाण केल्यामुळे त्या रक्तबंबाळ होऊन जागेवर बेशुद्ध होऊन कोसळल्या. या मारहाणीत त्यांचा जागीच मृत्यू झाला.

आईची हत्या केल्यानंतर मुलाने घटनास्थळावरून पळ काढला. परिसरातील नागरिकांना याची माहिती मिळताच त्यांनी पोलीस ठाण्यात धाव घेतली. तसेच आरोपीविरोधात तक्रार दाखल केली. पोलिसांना या घटनेची माहिती मिळताच त्यांनी घटनास्थळी धाव घेतली. आरोपी पसार झाल्यामुळे त्याचा शोध घेण्यात येत आहे. या अमानुष घटनेमुळे संपूर्ण गावात भीतीचे आणि शोककळा पसरलेली आहे.