वडील आणि मुलाच्या नात्याला काळिमा फासणारी घटना समोर येत आहे. संपत्तीच्या वादातून वडिलांनी आपल्या पोटच्या मुलाची हत्या केली आहे. ही धक्कादायक घटना वाशिम जिल्ह्यात घडली आहे.

काही दिवसांपासून कुटुंबात संपत्तीवरून वाद सुरू होता. वाद इतका विकोपाला गेला की, रागाच्या भरात बापाने मुलावर सुरीने सपासप वार करत त्याची हत्या केली. घटनेनंतर शेजाऱ्यांनी याची माहिती पोलिसांना दिली. पोलिसांनी आरोपी बापाला ताब्यात घेत त्याला अटक केली.

अनिल गोपाळ मोखडकर (वय वर्ष ४०) असे मृत व्यक्तीचे नाव आहे. तर, गोपाळ मोखडकर असे आरोपी वडिलांचे नाव आहे. मोखडकर कुटुंब वाशिम जिल्ह्यातील कारंजा शहरातील रहिवासी असल्याची माहिती आहे.

वडील आणि मुलामध्ये गेल्या काही दिवसापासून संपत्तीवरून वाद सुरू होता. आज सकाळी पुन्हा दोघांमध्ये बाचाबाची झाली. वाद विकोपाला गेला. नंतर बापाने धारदार सुरी घेतली आणि आरोपीवर सपासप वार केले. वार इतके केले की घरातच रक्ताचा पाट वाहू लागला.

वडिलांनी केलेल्या हल्ल्यात मुलाचा जागीच मृत्यू झाला. घटनेनंतर शेजाऱ्यांनी तातडीने पोलीस ठाण्यात धाव घेतली. तसेच आरोपी वडिलांविरोधात तक्रार दाखल केली. घटनेची माहिती मिळताच कारंजा पोलिसांनी घटनास्थळी धाव घेतली. तसेच चौकशी करून आरोपी बापाला बेड्या ठोकल्या.

आरोपीला बेड्या ठोकत बापाची रवानगी पोलीस ठाण्यात करण्यात आली. या प्रकरणी आता पोलीस पुढील तपास करीत आहेत. या धक्कादायक घटनेची माहिती परिसरात पसरल्यानंतर नागरिकांनी बापाविरोधात रोष व्यक्त केला. या घटनेची माहिती काही काळातच वाऱ्यासारखी गावात पसरली आहे.