भरत नागणे, साम टीव्ही

माढा तालुक्यातील अंजनगाव खोलोबा येथे छत्रपती शिवाजी महाराजांच्या पुतळ्यावरून मराठा आणि धनगर समाजामध्ये तणाव निर्माण झाला असून आता हा वाद दगडफेक आणि लाठीचार्जपर्यंत पोहोचला आहे. या प्रकरणात आता दोन्ही बाजूनी आक्रमक भूमिका घेतल्याने वातावरण अधिकच तापले आहे.

धर्मवीर छत्रपती संभाजीराजे शौर्य प्रतिष्ठानचे अध्यक्ष बाळराजे आवारे पाटील यांनी पुतळा बसवण्याच्या मुद्यावरून प्राध्यापक लक्ष्मण हाके यांना थेट इशारा दिला आहे. छत्रपती शिवाजी महाराजांच्या पुतळ्याला विरोध केल्यास रस्त्यावर कपडे फाटेपर्यंत मारू अशी कठोर भाषा त्यांनी वापरली. त्यांनी पुढे सांगितले की, राज्यभरात आतापर्यंत 600 पुतळे परवानगीशिवाय बसवले असून पुढेही हे काम सुरूच राहणार आहे. संबंधित जागा खोलोबा देवस्थानची नसल्याचा दावा करत विरोध करू नये, असे ही ते म्हणाले.

दरम्यान बाळराजे आवारे पाटील यांच्या या व्यक्तव्याला ओबीसे नेते लक्ष्मण हाके यनी जोरदार प्रत्युत्तर दिले आहे. मारण्याची भाषा करू नका, आम्ही गोळ्या झेलायला तयार आहोत. तसेच तुम्ही आमच्या तीर्थक्षेत्राची विटंबना केली. खेलोबा मंदिरावर दगडफेक केली असा गंभीर आरोपही त्यांनी केला. या वादामुळे परिसरात तणावपूर्ण शांतता असून पोलिसांनी बंदोबस्त वाढवला आहे. परिस्थिती नियंत्रणात ठेवण्यासाठी प्रशासन सतर्क झाले असून पुढील अनुचित प्रकार टाळण्यासाठी दोन्ही बाजूंना संयम बाळगण्याचे आवाहन करण्यात आले आहे.