Solapur Doctor Accident Death : सोलापूरमधील अक्कलकोट तालुक्यातील एका डॉक्टराचा अपघाती मृत्यू झालाय. सोलापूरहून तडवळे येथे जाताना मध्यरात्री कारचा भयंकर अपघात जाला. त्यामध्ये ४० वर्षीय डॉ. आशिष पनशेट्टी यांचा जागीच मृत्यू झालाय. मध्यरात्री अपघात झाल्याने रस्तावर गर्दी कुणीही नव्हते, त्यामुळे वेळीच वैद्यकीय मदत मिळाली नाही. डॉक्टरांचा मृतदेह सहा तास गाडीत पडून होता.

सोलापूर जिल्ह्यातील अक्कलकोट तालुक्यातील तडवळ गावात एक दुखद घटना घडली आहे. येथील प्रसिद्ध डॉक्टर आशिष इरण्णा पनशेट्टी (वय ४०) यांचा रविवारी रात्री कार अपघातात मृत्यू झाला. या घटनेने तडवळ गावात शोककळा पसरली आहे. डॉ. आशिष पनशेट्टी हे सोलापूरहून तडवळकडे कारने परतत होते. रात्री उशिरापर्यंत ते घरी न परतल्याने त्यांच्या पत्नीने त्यांच्याशी संपर्क साधण्याचा प्रयत्न केला, परंतु संपर्क होऊ शकला नाही. सकाळी त्यांचा मृतदेह त्यांच्या गाडीत आढळून आला.

पोलिसांनी दिलेल्या माहितीनुसार, मद्रे गावाजवळ त्यांची गाडी रस्त्यावरील खड्ड्यात अडकली आणि नंतर जवळच्या लाकडाच्या ढिगाऱ्यावर आदळून पलटी झाली. या अपघातात डॉ. आशिष गाडीच्या स्टेअरिंग आणि सीटमध्ये अडकल्याने त्यांना बाहेर पडता आले नाही. त्यात रात्रीची वेळ असल्यामुळे मदतही मिळाली नाही, त्यांचा कारमध्येच मृत्यू झाला. डॉ. आशिष हे तडवळ येथे हॉस्पिटल चालवत होते आणि त्यांच्या कार्यामुळे गावकऱ्यांमध्ये त्यांचा मोठा आदर होता. त्यांच्या अकाली निधनाने परिसरात हळहळ व्यक्त होत आहे.