मराठा आंदोलक मनोज जरांगे पाटील यांनी टाकलेल्या ऑडिओ बॉम्बमुळे राज्याच्या राजकरणात चांगलीच खळबळ उडाली आहे. या क्लिपमुळे शिंदेसेना आणि भाजपमध्ये देखील मोठी दरी निर्माण होताना दिसतेय. तसेच या क्लिपमध्ये 500 कोटी श्रीकांत शिंदे यांच्या मार्फत जरांगेंना दिलेत असा दावा एका महिलेने केला होता. या प्रकरणारवरून श्रीकांत शिंदे यांनी पहिल्यांदाच प्रतिक्रिया दिली आहे. शिंदे म्हणाले, मागच्या दोन दिवसांपासून यावर माझे संशोधन सुरू आहे. 500 कोटींबाबत मी पण शोध घेत आहे असे ते म्हणाले.

श्रीकांत शिंदे प्रसारमाध्यमांशी बोलताना म्हणाले की, गेल्या 2 दिवसांपासून मी यावरच रिसर्च करतोय. ज्याच्या कुणाकडे 500 कोटी रुपये पाठवले होते ते माझ्याकडे पोहोचले नाहीत. जो प्रश्न जरांगेंना पडला आहे तो मलाही पडला आहे. मी ते शोधायला चाललोय. आम्ही तीच चर्चा करत होतो. 500 कोटी एकत्र कसे दिसतील, किती गाड्या लागतील. कोण काय बोलते त्याला काही अर्थ नाही. या प्रकरणाची शहानिशा करण्याचे आदेश मुख्यमंत्र्यांनी दिले आहेत. काय गोष्टी आहेत त्या कळतील असे शिंदे म्हणाले.

जसे माध्यमे शोधताहेत तसे मी देखील मागील 2 दिवसांपासून शोधण्याचे काम करतोय तुम्ही पण शोधा. संशोधन करा. तुम्हाला कळले तर मला सांगा आणि मला काही कळले तर मी सांगतो असे म्हणत श्रीकांत शिंदे यांनी टोला लगावला.