बीडमधून एक धक्कादायक बातमी उघडकीस आली आहे. चक्क वसतिगृहातील लहान चिमुकल्यांना बाथरूमसह कपडे धुवायला लावले आहे. हा संपूर्ण प्रकार बीडच्या शृंगारवाडी फाटा येथील बाल नंदनवन इंग्लिश गुरुकुल वस्तीगृहात घडला. या घटनेचा व्हिडिओ समोर आला असून, या संबंधित संस्थाचालकावर कारवाई करून तात्काळ वसतिगृह बंद करण्यात यावे, अशी मागणी होत आहे.

श्रीमंत राजे यशवंतराव होळकर योजना ही बहुजन कल्याण मंत्रालयामार्फत राबवली जाते. धनगर समाजातील गोरगरीब मुलांना शाळांमध्ये शिकवण्यासाठी ही योजना राबवली जाते. मात्र या योजनेचा गैरफायदा घेऊन कोट्यावधी रुपये कमवले जातात.

यशवंत राजेश होळकर नावाने राज्य सरकार योजना राबवत आहे. संबंधित योजनेअंतर्गत बीड जिल्ह्यामध्ये जवळपास वीस वसतिगृह आहेत. त्यापैकी १८ वसतिगृह चालू आहेत. त्यामधील शृंगारवाडी येथील बाल नंदनवन हे वसतिगृह लहान मुलांसाठी आहे. मात्र या वसतिगृहाच चिमुकल्यांना साफसफाई करायला लावण्याचा प्रकार उघडकीस आला.

या वसतिगृहामध्ये या अगोदरही असे चुकीचे प्रकार घडले होते. या संदर्भात चौकशी करून वरिष्ठांना अहवाल पाठवला आहे. मात्र, पुन्हा असाच प्रकार समोर आल्यानंतर गावकऱ्यांनी संताप व्यक्त केला. दरम्यान, या प्रकरणी संबंधित कर्मचारी आणि संस्थाचालकावर कारवाई करण्यात येईल. तसेच अहवाल वरिष्ठांना पाठवण्यात येईल अशी माहिती यशवंत राजे होळकर योजनेचे समाज कल्याणचे अधिकारी यांनी दिली आहे.