औरंगाबाद : शिवसेनेत फूट पडल्यानंतर ठाकरे आणि शिंदे गट आमने-सामने आले आहेत. एकमेकांना डिवचण्याची एकही संधी दोन्ही गटाकडून सोडली जात नाही. शिंदे गटाच्या काही नेत्यांच्या निशाण्यावर सातत्याने उद्धव ठाकरे, आदित्य ठाकरे आणि संजय राऊत आहेत. एकीकडे ही परिस्थिती असताना शिंदे गटाचे आमदार आणि मंत्री संजय राठोड यांनी केलेल्या वक्तव्यामुळे अनेकांच्या भुवया उंचावल्या आहेत.

ठाकरे गटाचे आमदार आणि शिंदे गटाचे आमदार आम्ही एकमेकांच्या संपर्कात आहोत, अशी प्रतिक्रिया संजय राठोड यांनी दिली आहे. राजकीय संबंध वेगळे असले तरी जुनी मैत्री आमची कायम आहे, असं राठोड यांनी म्हटलं आहे.

आमच्यामध्ये मतभेत आहेत, मात्र मनभेत नाहीत. आम्ही एकमेकांशी आजही चांगलं बोलत आहोत. एकमेकांच्या संपर्कात आहोत, असं राठोड यांनी सांगितलं. शिवसेनेत आम्ही खांद्याला खांदा लावून कामं केली आहेत.

बाळासाहेबांच्या विचारांशी प्रेरित होऊन आम्ही काम करत होतो. आज तेही त्याच विचाराने काम करत आहेत आणि आम्ही देखील तसंच काम करत आहोत. अनेक वर्ष आम्ही सोबत काम केलंय तेवढे संबंध आमचे आहेत. त्यामुळे आजदेखील आम्ही एकमेकांच्या संपर्कात असल्याची माहिती संजय राठोड यांनी दिली.