मुंबई : शिंदे गटात ठिगण्या उडत असून लवकरच त्याचा स्फोट होईल असा मोठा दावा संजय राऊतांनी  (Sanjay Raut) केला आहे. राऊतांच्या दाव्यावर शिंदे गटाचे प्रवक्ते नरेश म्हस्के यांनी टीका केली आहे. संजय राऊत ज्यावेळी बोलतात, त्यावेळी एका हिंदी चित्रपटाचं गाणं आठवतं. पिंजरे मे पोपट बोले अशा पद्धतीने कुरमुड्या ज्योतिषीसमोरील जे कार्ड असतं तो ते कार्ड उचलतो आणि जे कही बोलायचं आहे ते बोलतो.

अशा पद्धतीने कुरमुडे ज्योतिषी जे आहेत राऊत साहेब, रोज सकाळी उठतात कार्ड उचलतात आणि बोलायला सुरुवात करतात.मुळात गद्दार कोणाला म्हणतात? काँग्रेसमधून शरद पवार साहेब बाजूला झाले ते काँग्रेसचे खासदार होते, आमदार होते. मग शरद पवार साहेबांच्या पण कपाळावर गद्दार लिहिलंय का? असा सवाल नरेश म्हस्के यांनी विचारला. (Maharashtra Politics News)

भुजबळ यांच्या मांडीला मांडी लावून तुम्ही बसताय ज्यांनी शिवसेना सोडली त्यांच्याही कपाळावर गद्दार लिहिलेलं आहे, तुम्हाला दिसलं मग त्यांच्या बाजूला मग कसे बसता? प्रियंका चतुर्वेदी या काँग्रेसमधून तुमच्याकडे आल्या त्यांच्याही कपाळावर गद्दार लिहिलेलं आहे.सचिन आहेर अजून किती जणांची नावे घेऊ ज्यांना तुम्ही आमदार केलं त्यांच्याही कपाळावर गद्दार लिहिलेलं दिसलं नाही का? असा संतप्त सवाल त्यांनी विचारला.

संजय राऊत साहेब रोज तुम्ही ज्या आमदार-खासदारांच्या नावाने खडे फोडताय, त्यांच्याच मतांवर तुम्ही खासदार म्हणून निवडून आला आहात. गद्दारांची मत तुम्हाला चालली का? हिम्मत असेल तर राजीनामा द्या आणि उतरा रिंगणात, असं आव्हानही त्यांनी संजय राऊतांना दिलं.

लोकांमधून तुम्ही कधी निवडून आलेले नाहीत.नाशिकमध्ये तुम्ही क्लीन बोल्ड झालेले आहात. तुमच्यामुळे शिवसेना संपलेली आहे आणि शिवसैनिक तुम्हाला तुमची जागा दाखवून देणार. आता तरी आत्मपरीक्षण करा. उद्धव ठाकरे यांना विनंती आहे, या पोपटाचं तोंड बंद करा नाहीतर उरलेली जनता देखील तुम्हाला सोडून निघून जाईल, असं नरेश म्हस्के यांनी म्हटलं.