- विनायक वंजारे

MLA Vaibhav Naik News : सिंधुदुर्ग जिल्ह्यातील शिवसेनेचे उपजिल्हाप्रमुख बबन शिंदे आणि राजा गावकर यांनी मुंबईत शिंदे गटात प्रवेश केला. मुख्यमंत्री एकनाथ शिंदे व उद्योगमंत्री उदय सामंत यांच्या उपस्थितीत हा प्रवेश झाला.

देवगड तालुक्यातील निष्ठवंत असलेले शिवसेनेचे सिंधुदुर्ग उपजिल्हाप्रमुख विलास साळसकर यांच्या दोन दिवसांपूर्वीच झालेल्या प्रवेशानंतर बबन शिंदे यांचा शिंदे गटातील प्रवेशाने शिवसेनेला तळकोकणातील बालेकिल्ल्यात बसलेला हा दुसरा मोठा धक्का मानला जात आहे.

बबन शिंदे आणि राजा गावकर यांच्या शिंदे गटातील प्रवेशामुळे कुडाळ-मालवण मतदार संघाचे आमदार वैभव नाईक यांना देखील हा मोठा धक्का असल्याची चर्चा राजकीय वर्तुळात रंगली आहे.

सिंधुदुर्ग जिल्ह्याचे शिवसेनेचे (shivsena) उपजिल्हाप्रमुख बबन शिंदे आणी राजा गावकर यांनी अखेर शिंदे गटात प्रवेश करत एकच खळबळ उडवून दिली आहे. शिंदे यांच्या प्रवेशा वेळीस आमदार रविंद्र फाटक, किरण उर्फ भैय्या सामंत, माजी खासदार सुधीर सावंत, कणकवलीचे नगरसेवक भूषण परूळेकर, सुनील पारकर, अमोल लोके यासह शिंदे गटातील अनेक पदाधिकारी व नेते उपस्थित होते.

आमदार वैभव नाईकांशी शिंदेंचे बिनसलं

बबन शिंदे हे मालवण तालुक्यातील असून ते शिवसेनेचे निष्ठावंत उपजिल्हाप्रमुख मानले जात होते. मालवण शहरातील नगरपंचायत निवडणुकीत शिवसेनेची सत्ता आणण्यात त्यांचा मोठा वाटा होता. शिंदे- फडणवीस सरकार आल्यानंतर ते शिवसेनेशी एकनिष्ठ होते. आमदार वैभव नाईक (vaibhav naik) यांचे ते निष्ठावंत व खंदे समर्थक मानले जात. पण काही दिवसांपूर्वी आमदार वैभव नाईक यांच्याशी त्यांचं बिनसलं. पक्षात निर्णय घेताना आपल्याला डिवलले जात असल्याची तक्रार करत स्थानिक नेतृत्वावर ते नाराज होते.

मालवणची समीकरणं बदलतील

बबन शिंदे यांच्या प्रवेशाने अगामी मालवण नगरपंचायती निवडणूकीची आणी कुडाळ- मालवण विधानसभा मतदार संघातील निवडणूकीची समिकरणे बदलण्याची शक्यता आहे. बबन शिंदे यांचा दांडगा जनसंपर्क आणी चांगले नेटवर्क यामुळे शिंदे- फडणवीस सरकारच्या गटाची ताकद मालवणात चांगलीच वाढणार आहे.

Edited By : Siddharth Latkar