Rajan Vichare News:

बुधवारी शिवसेना आमदार अपात्रता प्रकरणी निकाल जाहीर होणार आहे. मात्र त्या आधीच ठाकरे गटाला मोठा झटका मिळाला. ठाकरे गटाचे आमदार रवींद्र वायकर यांच्या घरी ईडीने छापेमारी केली. त्यानंतर ठाकरे गटाचे खासदार राजन विचारे यांच्या घरावर आयकर विभागाकडून छापेमारी करण्यात आल्याची चर्चा सुरू होती. मात्र ही माहिती खोटी असल्याचा खुलासा विचारे यांच्या मुलीने स्वत: केला आहे.

राजन विचारे यांच्या घरावर छापेमारी केली असून त्यांच्याशी संबंधीत व्यवसायिकांना चौकशीसाठी बोलण्यात आलं आहे, अशीही चर्चा सुरू होती. मात्र असं काहीही झालेलं नसल्याचं त्यांच्या मुलीने स्पष्ट केलं आहे. राजन विचारे सध्या हैदराबाद येथे एका मिटींसाठी गेले आहेत.

राजन विचारे यांनी देखील याबाबत खुलासा केला आहे. माध्यमांशी फोनवर संवाद साधत त्यांनी सांगितलं की, माझ्या घरावर कोणत्याही प्रकारची छापेमारी झालेली नाही. तसे झाले असते तर मला नोटीस आली असती. माझ्या घराबाहेर देखील नोटीस लागली असती. माझ्या कोणत्याही घरी ईडी किंवा आयकर विभागाने धाड टाकलेली नाही, असं राजन विचारेंनी म्हटलं.