सचिन बनसोडे 

शिर्डी (अहमदनगर) : श्री साईबाबांचे भक्त वर्षभर देश विदेशातून दर्शनासाठी शिर्डीत येत असतात. काही भाविकांकडून दर्शन घेण्यासाठी आल्यानंतर साईचरणी रोख रक्कम स्वरूपात किंवा दागिन्यांचे दान करत असतात. त्याच प्रमाणे एका साईभक्ताने ४२ लाख ८० हजार रुपयांचा सुवर्ण मुकुट अर्पण केला आहे. 

शिर्डीच्या (Shirdi) साईबाबांचे देश विदेशातील लाखो भाविकांची श्रद्धा असल्याने भाविक साईबाबांच्या झोळीत भरभरून दान देत असतात. त्यानुसार आज एका साईभक्ताने साईचरणी ६४८ ग्रॅम वजनाचा सोन्याचा मुकुट अर्पण केला असल्‍याची माहिती श्री साईबाबा (Saibaba) संस्‍थानचे मुख्‍य कार्यकारी अधिकारी गोरक्ष गाडीलकर यांनी दिली. या सोनेरी मुकूटाची किंमत ४२ लाख ८० हजार रुपये असून मुर्तीवर चढवलेला हा मुकुट अतिशय सुंदर असून दानशुर साई भक्‍ताने संस्थानला आपल नाव जाहीर न करण्याची विनंती केली आहे.

आरती दरम्यान मूर्तीवर चढविला मुकुट 

नित्यनियमाप्रमाणे (Shirdi Sai Baba) साईबाबांची आरती होत असते. त्यानुसार आज सकाळी शिर्डी माझे पंढरपूर या आरतीला हा सुंदर नक्षीकाम असलेला सुवर्ण जडीत मुकुट साईबाबांच्या मुर्तीवर चढवण्यात आला. मुकुट अर्पण केलेल्या भक्ताने आपले नाव गुपित ठेवले आहे.