राष्ट्रवादी काँग्रेस (शरदचंद्र पवार गट) पक्षाला सोडचिठ्ठी देत पाटणचे युवा नेते सत्यजितसिंह पाटणकर यांनी नुकताच भारतीय जनता पक्षात जाहीर प्रवेश केला. पक्षप्रवेशानंतर त्यांनी कराड येथे यशवंतराव चव्हाण यांच्या समाधीस्थळी अभिवादन करत आपल्या राजकीय प्रवासाची नव्याने सुरुवात केल्याचे स्पष्ट केलं. तसेच पक्षप्रवेशावरून शंभूराज देसाई गटाकडून करण्यात येणाऱ्या टीकेला प्रत्युत्तर देताना पाटणकरांनी थेट देसाई यांच्यावर निशाणा साधला.

पक्षप्रवेशावरून शंभूराज देसाई गटाकडून सत्यजितसिंह पाटणकर यांच्यावर वारंवार टीकास्त्र डागण्यात येत होतं. भाजपात पक्षप्रवेश केल्यानंतर त्यांनी शंभूराज देसाई यांना थेट प्रश्न उपस्थित करत निशाणा साधला. 'आम्ही छत्रपतींच्या उपस्थितीत भाजपात प्रवेश केला. पण तुम्ही गुवाहाटी आणि सुरतला पळून जाण्याचं कारण काय?' असा रोखठोक सवाल त्यांनी शंभूराज देसाई यांना केला. या टीकास्त्रानंतर पाटणमध्ये महायुतीतील अंतर्गत वाद समोर आला आहे.

सत्यजित पाटणकर यांनी भाजपात प्रवेश केल्यानंतर शंभूराज देसाई नाराज असल्याची चर्चा आहे. दरम्यान, या घडामोडींवर प्रतिक्रिया देताना पाटणचे आमदार आणि पर्यटनमंत्री शंभूराज देसाई यांनी यासंदर्भात, 'आम्ही बोलणं योग्य नाही, आम्ही आमचं काम करीत आहोत. एकनाथ शिंदे मुख्यमंत्री आणि देवेंद्र फडणवीस उपमुख्यमंत्री असताना, महायुती म्हणून आम्ही सगळीकडे काम केलं आहे. मंत्री म्हणून ज्या जबाबदाऱ्या दिल्या होत्या, त्या पूर्ण केल्या', असंही शंभूराज देसाई यांनी स्पष्ट केलं.

तसेच, त्यांनी पाटणकर यांचं नाव न घेता स्पष्ट केलं की, 'आपल्या विधानसभा मतदारसंघात राष्ट्रवादी (शरद पवार गट) मधील एका नेत्याचा भाजपात प्रवेश झाला आहे. याबाबत मी मुख्यमंत्री आणि उपमुख्यमंत्र्यांना भेटून माहिती देणार आहे. त्यासाठी भेटीची वेळ मागितली आहे.'