Santosh Deshmukh Case Update : मस्साजोगचे सरपंच संतोष देशमुख यांच्या हत्येचं कनेक्शन धाराशिवशी असल्याचा खळबळजनक दावा आमदार सुरेश धस यांनी केला आहे. 'धाराशिवमधील पोलिसांनी, कर्मचाऱ्यांनी हत्या प्रकरणातील आरोपींना पळून जायला मदत केली. त्यांच्यावरही कारवाई व्हावी' अशी मागणी धस यांनी माध्यमांसमोर केली आहे.

'वाशी पोलिसांनी, कर्मचाऱ्यांनी संतोष देशमुख हत्या प्रकरणातील आरोपींना पळून जायला मदत केली. अधिकारी सांगतात, आरोपी जंगलातून पळून गेले. पण ते जंगलातून नाहीत तर वाशी शहरातून पळून गेले. वाशी पोलीस ठाण्यातील काही अधिकारी, कर्मचाऱ्यांनी आरोपींना फरार व्हायला मदत केली', असे म्हणत सुरेश धस यांनी पोलिसांवर आरोप केले. 'मदत करणाऱ्यांची चौकशी होऊन त्यांच्यावर स्वतंत्र मकोका लावावा किंवा त्यांना सहआरोपी करावे', असेही धस म्हणाले.

बीडचे आमदार सुरेश धस सध्या धाराशिव दौऱ्यावर आहेत. जयकुमार गोरे यांची धाराशिव जिल्हा संपर्क मंत्री म्हणून नियुक्ती आणि भाजप नेते सुजितसिंह ठाकूर यांच्या वाढदिवसानिमित्त धाराशिवच्या परंडा येथे सत्कार समारंभ आयोजित करण्यात आला होता. या कार्यक्रमाला सुरेश धस उपस्थित होते. तेव्हा बोलताना धस यांनी 'संतोष देशमुख हत्या प्रकरणात न्याय मिळत नाही तोपर्यंत स्वागत, सत्कार स्वीकारणार नाही', असे वक्तव्य केले.

माध्यमांशी बोलताना सुरेश धस यांनी मनोज जरांगे पाटील यांच्या नाराजीवर बोलण्यास नकार दिला. जरांगे माझे दैवत आहेत, त्यांच्यावर मी काहीही बोलणार नाही असे सुरेश धस यांनी म्हटले आहे. तसेच कोल्हापूर येथील मराठा समाजाचे अधिवेशन हे त्या जिल्ह्यापुरते आहे. आंदोलनात मनोज जरांगे पाटलांना डावल्याचा अर्थ काढू नये असेही धस म्हणाले.