Sanjay Raut on Sharad Pawar: विरोधीपक्ष नेते अजित पवार भाजपसोबत जाणार अशी चर्चा सध्या राज्यातील राजकरणात रंगली आहे. अशातच शरद पवार यांच्यासोबत झालेल्या भेटीनंतर ठाकरे गटाचे नेते संजय राऊत यांनी मोठा गौप्यस्फोट केला आहे. संजय राऊत म्हणाले आहेत की, ''भाजपात जाण्यासाठी कुटुंबियांवर दबाव असल्याचं शरद पवार यांनी सांगितलं.''

काय म्हणाले संजय राऊत?

संजय राऊत यांनी आज पत्रकारांशी बोलताना सांगितलं आहे की, ''मी आणि उद्धव ठाकरे हे गेल्या आठवड्यात शरद पवार याना भेटलो. आमची प्रदीर्घ चर्चा झाली. ही चर्चा महाविकास आघाडीच्या संदर्भात, राज्यातील राजकारण यावर झाली. केंद्रीय तपास यंत्रणांचा दबाव वापरून विरोधी पक्षाचे आमदार फोडायचे, यावरही चर्चा झाली.''

संजय राऊत म्हणाले की, ''शिवसेनाबाबतही त्यांनी तेच तंत्र वापरलं आणि आमदार फोडले. यातच आदित्य ठाकरे यांनी देखील सांगितलं, कसे प्रमुख नेते ईडीच्या भीतीने रडत होते. तेच तंत्र आता काँग्रेस आणि राष्ट्रवादी या दोन्ही पक्षाच्या बाबतीत वापरलं जात आहे. हा दबाव कोणत्या प्रकारचा आहे, यावर चर्चा झाली.'' (Latest Marathi News)

संजय राऊत पुढे म्हणाले की, ''शरद पवार यांनी सांगितलं, काही झालं तरी राष्ट्रवादी काँग्रेस पक्ष म्हणून आम्ही भाजपसोबत जाणार नाही. कितीही दबाव असला तरी आम्ही तो निर्णय घेणार नाही, असं त्यांनी आम्हाला ठामपणे सांगितलं. यातच काही आमदार आणि त्यांच्या कुटुंबियांवर दबाव आहे. तपास यंत्रणांद्वारे मुलांना बोलावलं जात आहे . घरातील महिलांना चौकशीसाठी बोलावलं जातं, असे आमदार दबावात आहे. तो निर्णय त्यांचा असतो, तो निर्णय पक्षाचा नसतो, असं शरद पवार यांचं म्हणणं आहे.''