उपमुख्यमंत्री अजित पवार आणि देवेंद्र फडणवीस यांच्यावर गुन्हा दाखल झाला पाहिजे, अशी मागणी खासदार संजय राऊत यांनी केली आहे. आज माध्यमांशी संवाद साधताना त्यांनी असं म्हटलं. अजित पवारांनी काल आर. आर. पाटलांबाबत केलेल्या वक्तव्यावरून संजय राऊतांनी अशा शब्दांत निशाणा साधला आहे.

आबांचे केस फार लहान होते ते केसांनी गळा कापू शकत नाहीत. ते अत्यंत कर्तबगार असे राज्याचे गृहमंत्री होते. गृहमंत्री म्हणून त्यांनी कधी चुकीचं काम केलं असंही आम्हाला वाटत नाही. अजित पवारांनी काल आर. आर. पाटलांनी केलेली सही दाखवली. त्यामुळे अजित पवार आणि देवेंद्र फडणवीस यांच्यावर गुन्हा दाखल झाला पाहिजे, असं संजय राऊत म्हणाले.

अजित पवार आणि देवेंद्र फडणवीस यांनी गोपनीयतेची जी शपथ घेतली आहे, त्या व्यक्तीने अशा पद्धतीने गोपनीयतेचा भंग करणे हा फार मोठा गुन्हा आहे. त्यामुळे राज्यपालांनी या दोघांवर गुन्हा दाखल करण्याचे आदेश दिले पाहिजेत. तुम्ही जनतेसमोर या गोष्टी कशा काय दाखवू शकता? अशा शब्दांत राऊतांनी हल्लाबोल केला आहे.

नेमकं काय म्हणाले अजित पवार?

"माझ्यावर आरोप झाले. मला बदनाम करण्याचा प्रयत्न झाला. माझ्यावर ७० कोटींचा आरोप करूया असं ठरवलं. त्यावेळी एक फाईल तयार झाली आणि ती फाईल गृह खात्याकडे गेली. त्यावर त्यांनी अजित पवारांची चौकशी करावी यासाठी सही केली. म्हणजे हेतर केसाने गळा कापण्याचे काम आहे, असं अजित पवारांनी काल एका सभेत म्हटलं होतं. तसेच पुढे अजित पवारांनी म्हटलं की, एका कार्यक्रमात त्यांना तंबाखू खाताना मी पाहिलं. त्यावेळी तंबाखू खाऊ नका असा सल्ला मी त्यांना दिला होता, असं सांगत अजित पवारांनी आरआर पाटलांची नक्कल देखील करून दाखवली होती. त्यावरून आता संजय राऊतांसह विरोधकांनी अक्रमक भूमिका घेतल्या आहेत.