भरत मोहळकर, साम टीव्ही, साम टीव्ही

सांगली लोकसभा निवडणुकीत विशाल पाटलांचा विजय झाला. मात्र विजयानंतर विशाल पाटील आणि विश्वजित कदम यांनी जयंत पाटलांनाच आव्हान दिलंय. तर आता इस्लामपूर-वाळवा मतदारसंघावर आमचं जेवढं लक्ष नव्हतं. त्याच्या 10 पट लक्ष देणार आहोत. तसंच या मतदारसंघात आता नवे निर्णय घ्यावे लागतील, असं म्हणत जयंत पाटलांना इस्लामपूर मतदारसंघात जाऊन खुलं आव्हान दिलंय. त्यामुळे सांगलीत पुन्हा एकदा वर्चस्वाची लढाई रंगलीय.

महाविकास आघाडीतील जागा वाटपात सांगलीची जागा ही ठाकरे गटाला सोडण्यात आली. यामागे जयंत पाटील हे सूत्रधार असल्याची चर्चा रंगली होती. मात्र हे आरोप जयंत पाटलांनी निवडणुकीदरम्यान फेटाळले होते. त्यानंतर विशाल पाटलांच्या उमेदवारीसाठी विश्वजित कदमांनी जोरदार प्रयत्न केले.

मात्र त्यानंतरही उमेदवारी न मिळाल्याने विशाल पाटलांनी बंडखोरी केली आणि सांगलीतून 1 लाख मतांनी विजय मिळवला. मात्र कदम आणि विशाल पाटलांचा जयंत पाटलांवरचा राग कमी व्हायला तयार नसल्याचं दिसतंय. त्यामुऴेच आता सांगलीत सत्कार व्हायच्या आधी आम्ही इस्लामपूर मतदारसंघात आल्याचं सांगत आगामी काळात जयंत पाटलांना आव्हान देण्याचे संकेत विशाल पाटलांनी दिलेत.

सांगलीत विशाल पाटील आणि जयंत पाटील यांच्या घराण्यातला पारंपरिक वाद आता पुढच्या पिढीतही सुरू झालाय. त्यामुळे लोकसभेच्या तिकीटावरून जयंत पाटलांनी विशाल पाटलांना शह दिल्याची चर्चा होती. मात्र विशाल पाटलांनी विजय मिळवल्यामुळे जयंत पाटलांनाच सर्वात मोठा धक्का मानला गेला.

आता कदम आणि पाटलांनी थेट जयंत पाटलांना त्यांच्या बालेकिल्ल्यात खुल आव्हान दिल्यामुळे ही आगामी विधानसभेच्या संघर्षाची नांदी समजली जातेय.