सांगली : नांदणी येथील श्री जिनसेन मठामधील 'माधुरी' हत्तीला जामनगर (गुजरात) येथील वनतारा उद्यानामध्ये हलविल्याच्या निषेधार्थ सकल जैन समाज संतप्त झाला आहे. या विरोधात तीव्र आंदोलन छेडण्यात आले असून मिरज येथील महाराणा प्रताप चौकात जोरदार घोषणाबाजी करत रिलायन्स कंपनीच्या पोस्टरला जोडे मारून तीव्र निषेध करण्यात आला. तसेच उत्पादनांवर बहिष्कार टाकण्याचा निर्णय समाजाने घेतला.

कोल्हापूरच्या शिरोळ तालुक्यातील नांदणी येथील मठातील माधुरी हत्तीणीला जामनगरमधील वनताराकडे सुपूर्द करण्यात आल्यानंतर प्रचंड जनआक्रोश सुरू आहे. या विरोधात सांगलीच्या मिरजमध्ये देखील आज जैन समाज आक्रमक झाल्याचे पाहण्यास मिळाले. यावेळी आंदोलकांनी रिलायन्सच्या पोस्टर्स फाडून व त्यास जोडे मारुन अंबानी यांच्या विरोधात जोरदार घोषणाबाजी केली. 

रिलायन्स नेटवर्कचे ७ हजार सिमकार्ड केले वर्ग 

वनतारा उद्यानात पाठविण्यात आलेल्या माधुरी हत्तीला पुन्हा जिनसेन मठात परत आणण्यासाठी न्यायालयात लढू असा इशारा यावेळी देण्यात आला. या आंदोलनात मिरज येथून मोठ्या संख्येने जैन समाज बांधव उपस्थित होते. विशेष म्हणजे, सुमारे ७ हजार मोबाईल सिमकार्ड रिलायन्स नेटवर्कमधून इतर कंपन्यांकडे वळवून समाजाने अंबानींना आर्थिक फटका दिला आहे. यावेळी माजी खासदार राजू शेट्टी यांच्या पाठिंब्याचे पत्र सादर करण्यात आले.

रिलायन्सची वस्तू खरेदी न करण्याचा ठराव 
आंदोलन करणाऱ्या जैन समाज बांधवानी यावेळी जोरदार घोषणाबाजी करत समाजाच्या वतीने एक ठराव देखील करण्यात आला आहे. या ठरावानुसार आता रिलायन्स कंपनीची कोणतीही वस्तू खरेदी केली जाणार नाही. यामुळे अंबानी समूहावर सामाजिकदृष्ट्या दबाव टाकण्याचा प्रयत्न असल्याचे दिसून येते. यामुळे आगामी काळात माधुरी हत्तीला परत आणण्यासाठी जैन समाजाने लढा उभारला आहे.