हिंगोली : सतरा हजार लोकसंख्येचे गाव असलेल्या हिंगोलीच्या गोरेगाव ग्रामपंचायतीत महिला सरपंच पद राखीव होते. यामुळे (Hingoli) महिलेची निवड करण्यात आली होती. मात्र या महिला सरपंचाला पतीने मारहाण करत राजीनामा देण्यास भाग पडले. पत्नीने याबाबत ग्रामपंचायतीच्या (Grampanchayat) विशेष सभेत खुलासा केल्याने खळबळ उडाली आहे. यानंतर ग्रामस्थांच्या मागणीनंतर मारहाण करणाऱ्या पतीवर गुन्हा दाखल करण्यात आला आहे. (Tajya Batmya)

देशात महिलांना ५० टक्के आरक्षण देण्यासाठी सरकारने कायदा लागू केला, मात्र या कायद्याची अंमलबजावणी सुरू होण्याआधीच पायमल्ली होत असल्याचा धक्कादायक प्रकार हिंगोलीत पुढे आला आहे, जिल्ह्यातील १७ हजार लोकसंख्येचे गाव असलेल्या हिंगोली तालुक्यातील गोरेगाव ग्रामपंचायतीच्या महिला सरपंच गंगुबाई कावरखे या सरपंचपदावर विराजमान होत्या. मात्र त्यांना पतीने मारहाण करत सरपंचपदाचा राजीनामा देण्यास भाग पाडले. ग्रामपंचायतीच्या विशेष सभेत (Gram Sabha) स्वतः महिला सरपंचाने खुलासा करत सरपंचपदाचा राजीनामा देण्यास दबाव टाकणाऱ्या पतीवर गंभीर आरोप केल्याने खळबळ उडाली आहे.  

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

प्रशासनाने राजीनामा घेतला मागे 

दरम्यान गोरेगावमधील नागरिकांचे विकासाचे स्वप्न पूर्ण करण्यासाठी आपण मागील अडीच वर्षापासून गोरेगाव ग्रामपंचायतच्या सरपंच पदावर विराजमान आहोत. यापुढे देखील गावात विकासात्मक कामे करण्यासाठी मला सरपंचपदी पूर्ण कार्यकाळ होईपर्यंत कर्तव्य पार पाडायचे आहे. त्यामुळे पतीच्या दबावापोटी आपण दिलेल्या राजीनामा नामंजूर करावा; अशी विनंती महिला सरपंच गंगुबाई कावरखे यांनी केली. यानंतर आता प्रशासनाने हा राजीनामा नामंजूर केला आहे. मात्र या प्रकारानंतर गोरेगावसह संपूर्ण जिल्ह्यात खळबळ उडाली. पत्नी असलेल्या महिला सरपंचाला मारहाण करत राजीनाम्यासाठी दबाव आणणाऱ्या महिला सरपंचाचे पती रामराव कावरखे यांच्या विरोधात गुन्हा दाखल करण्याची मागणी ग्रामस्थांनी केली आहे. तसेच राज्याच्या महिला आयोगाने देखील संपूर्ण प्रकरणाची दखल घेऊन कार्यवाही करण्याची मागणी गोरेगावमधील महिला ग्रामस्थांनी केली आहे.