सांगली : कोल्हापूर येथून बसने घरी परतलेल्या महिलेवर काळाने झडप घातली आहे. बसमधून प्रवास करत आल्यानंतर बसथांब्यावर महिला उतरली. मात्र बसमधून उतरल्यानंतर रस्त्याच्या बाजूने जात असताना त्याच बसने धडक देत महिलेला चिरडले. यात महिलेचा जागीच मृत्यू झाल्याची घटना सांगली शहरात घडली आहे. काही अंतरावरच घर असताना काळाने झडप घातली आहे. 

सांगली शहरातील आकाशवाणी येथे घडलेल्या अपघातात शीतल प्रकाश आंब्रे (वय ४१) असे मृत झालेल्या महिलेचे नाव आहे. दरम्यान मोलमजूरी करून कुटुंबाचा उदरनिर्वाह चालवणाऱ्या महिलेचा प्रशासकीय अनास्थेमुळे बळी गेला आहे. शीतल आंब्रे या कामानिमित्त कोल्हापूरला गेल्या होत्या. काम आटोपल्यानंतर कोल्हापूर येथील सायंकाळी पुन्हा आपल्या घरी एसटीने प्रवास करत येत होत्या. 

एसटीतुन उतरल्यानंतर त्याच बसची धडक 

दरम्यान सांगली शहरातील आकाशवाणीजवळील थांब्यावर त्या एसटीतून उतरल्या. मात्र एसटी थांबली त्याठिकाणी रस्त्यावर पावसाचे पाणी असल्याने त्या बाजूने घराकडे निघाल्या होत्या. याचवेळी काळाने त्यांच्यावर घाला घातला. ज्या एसटीने त्यांनी प्रवास केला त्याच एसटीची धडक बसल्याने त्या खाली कोसळल्या. यात त्यांचा मृत्यू झाला. सदर घटना रात्री आठच्या सुमारास सांगलीतील आकाशवाणी केंद्रासमोर घडली. 

मुंबई- पुणे महामार्गावर तरुणाचा जागीच मृत्यू
मावळ : जुने मुंबई- पुणे महामार्गावरील जांभूळ फाटा येथील माऊली हॉटेल समोर भरधाव वेगात आलेल्या हायवाच्या धडकेत मोटारसायकलस्वार तरुणाचा जागीच मृत्यू झाला. या अपघातानंतर हायवा चालक वाहनासह पसार झाला आहे. अविनाश चंद्रकांत दोडमणे (वय २१) असे मृत तरुणाचे नाव आहे. अविनाश मोटारसायकलवरून रस्ता ओलांडत असताना दुर्दैवी अपघात झाला. या धडकेत त्याच्या पोटास व हाताला गंभीर दुखापत होऊन जागीच मृत्यू झाला. अधिक तपास वडगाव पोलीस करीत आहे.