Samruddhi Mahamarg : समृद्धी महामार्गावर कोपरगाव शिवारात केमिकल वाहतूक करणाऱ्या वाहनाला आग लागल्याची घटना मंगळवारी रात्री आठ वाजेच्या दरम्यान घडली होती. तब्बल सहा तासांनंतर मध्यरात्री दोन वाजता आगीवर नियंत्रण मिळवण्यात यश आले. यात कुठलीही जीवितहानी झाली नसली तरी केमिकल वाहतूक करणारे वाहन जळून खाक झालं आहे. आगीवर नियमंत्रण मिळवण्यासाठी यादरम्यान समृध्दी महामार्गावरील वाहतूक थांबवण्यात आली होती.

छत्रपती संभाजीनगरहून मुंबईच्या दिशेने केलिकल घेऊन निघालेल्या वाहनाला अहिल्यानगर जिल्ह्यातील कोपरगाव शिवारात आग लागल्याची घटना मंगळवारी रात्री घडली. प्रसंगावधान राखत चालकाने वाहन थांबवत बाहेर उडी मारून स्वतःचे प्राण वाचवले. गाडीत केमिकल असल्याने आग आणखी भडकली आणि काही क्षणात समृध्दी महामार्गावर आगीचा आगडोंब उसळला. माहिती मिळताच कोपरगाव, शिर्डी, राहाता, श्रीरामपूर, सिन्नर अशा विविध ठिकाणची अग्निशमन वाहने घटनास्थळी दाखल झाली.

मात्र केमिकलमुळे उसळलेली आग शर्थीचे प्रयत्न करूनही आटोक्यात येत नव्हती. अखेर सहा तासांच्या प्रयत्नांनंतर रात्री दोन वाजेच्या दरम्यान आगीवर नियंत्रण मिळवण्यात यश आलंय. या आगीत कुठलीही जीवितहानी झाली नसली तरी संबंधित वाहन जळून खाक झालंय. दरम्यान मोठ्या प्रमाणात आग लागल्याने समृध्दी महामार्गावरील वाहतूक थांबवण्यात आली होती. त्यामुळे इतर वाहन चालकांना मोठा मनस्ताप सहन करावा लागला. आगीवर नियंत्रण मिळवल्यानंतर वाहतूक सुरळीत झाली. पण आग नेमकी कशामुळे लागली होती? हे मात्र अद्याप स्पष्ट होऊ शकले नाही.