रामू ढाकणे 

छत्रपती संभाजीनगर : आपल्यावर सोपविण्यात आलेली जबाबदारी झटकून आपले काम दुसऱ्याला करण्यास लावण्यासाठी बाहेरचे व्यक्ती कामावर ठेवल्याचा धक्कादायक प्रकार छत्रपती संभाजीनगर शहरातील घाटी रुग्णालयात समोर आला आहे. रुग्णालयातील तब्बल ११ कर्मचाऱ्यांनी हा प्रकार केल्याची माहिती समोर येत आहे. 

संभाजीनगरच्या घाटी रुग्णालयाच्या (Ghati Hospital) एक्स रे विभागातील विनयभंग प्रकरण केल्याचा प्रकार घडला होता. यानंतर रुग्णालयातील सदरची धक्कादायक बाब समोर येत आहे. यात रुग्णालयातील ११ कर्मचाऱ्यांनी आपल्या स्वतःच्या कामासाठी परस्पर बाहेरचे लोक ठेवले आहेत. विशेष म्हणजे महिला रुग्णाच्या वार्डात चक्क महीला कर्मचाऱ्याऐवजी बाहेरच्या पुरुषाकडून काम करून घेतले जात आहे. 

१२ हजाराच्या पगारावर ठेवले रुग्णालयात 

एक्स रे काढण्यासाठी गेलेल्या तरुणीला टॉप काढायला लावून विनयभंग केल्यानंतर ही सगळी गोपनीय माहिती समोर आली आहे. घरी बसून ४० हजार घ्यायचे आणि बाहेरच्या लोकांना १२ हजार रुपये हातात टेकवायचे; असा या कामचुकार कर्मचाऱ्यांचा फंडा असल्याची माहिती समोर आली आहे. महिन्यातून एकदा कार्यालयात येऊन हजेरीपत्रकावर स्वाक्षरी करायची, असा हा प्रकार आहे.