रामू ढाकणे 

छत्रपती संभाजीनगर : रेल्वे प्रवासादरम्यान मुलीला शौचालयात टाकून देत जन्मदात्या आई- वडिल तेथून पसार झाल्याचा धक्कादायक प्रकार समोर आला आहे. रेल्वेच्या शौचालयातून मुलीचा रडण्याचा आवाज आल्याने हा प्रकार उघडकीस आला असून पोलिसांकडून त्या मुलीच्या आई- वडिलांचा शोध घेतला जात आहे.     

लिंगमपल्ली ते मुंबई जाणाऱ्या देवगिरी एक्स्प्रेसमधे (Railway) मध्यरात्री हा प्रकार समोर आला आहे. शौचालयात आढळून आलेली मुलगी हि साधारण एक ते दीड महिने वयाची आहे. रेल्वेतून प्रवास करताना रात्रीच्या सुमारास मुलीला शौचालयात बेवारस अवस्थेत सोडून तिच्या कुटुंबाने पोबारा केला. (sambhajinagar) छत्रपती संभाजीनगर रेल्वे स्थानकात हा प्रकार रेल्वेत प्रवास करणाऱ्या काही प्रवाशांना लक्षात आला. त्यानंतर त्यांनी मनमाड येथे गाडी पोहचताच पोलिसांना याबाबत माहिती दिली. 

दरम्यान गाडीमध्ये हे मुल कोणाचे आहे का? याबाबत पोलिसांनी शोध घेतला. परंतु कोणीही त्याची जबाबदारी घेतली नसल्याने अखेर रेल्वे पोलीस ठाणे मनमाडमध्ये हे प्रकरण दाखल करण्यात आले. त्याबाबत माहिती पत्रक काढून पोलिसांकडून बाळाच्या कुटबियांचा शोध आता घेतला जात आहे. दरम्यान मुलगी सुखरूप असल्याची माहिती रेल्वे पोलिसांची दिली आहे.