संभाजीनगरमध्ये ३५ जणांना घेऊन जाणाऱ्या वऱ्हाडाच्या ट्रकचा भीषण अपघात झाला आहे. या भीषण दुर्घटनेत एका महिलेचा मृत्यू झाला असून अनेक जण गंभीर जखमी झाले आहेत. सदर घटना सिल्लोड-भराडी रस्त्यावरील आंबा फाट्याजवळ घडली असून या घटनेनंतर कुटुंबीयांनी हळहळ व्यक्त केली आहे.

मिळलेल्या माहितीनुसार, जळगाव जिल्ह्यातून श्रीरामपूरकडे लग्नाचे वऱ्हाड घेऊन आयशर टेम्पो येत होता. २० फेब्रुवारी रोजी पहाटे ३ वाजेच्या सुमारास चालकाला डुलकी लागल्याने टेम्पो सिल्लोड-भराडी रस्त्यावरील आंबा फाट्याजवळ वीज खांबाला धडकून उलटला. अपघाताच्या वेळी टेम्पोमध्ये महिला, वृद्ध आणि मुलांसह सुमारे ३० ते ३५ प्रवासी होते.

या दुर्दैवी घटनेत एका महिलेचा मृत्यू झाला असून दोन जण गंभीर जखमी झाले आहेत. रेखाबाई वसंत गोसावी यांचा मृत्यू झाला आहे. तर सविता गोसावी (वर्षे ४०), सरुबाई गोसावी (वर्षे ५०),वसंताबाई कोळी (वर्षे ६५), ममता कोळी (वर्षे ११), साहिल सपकाळ (वर्षे १३) , पुरुषोत्तम तायडे (वर्षे ११), प्रमिलाबाई गोसावी (वर्षे ५५) हे जखमी झाले आहे.

ज्यावेळी अपघात झाला, त्याच वेळी पोलिसांची गस्त सुरू होती. वीज खांबाला धडक बसल्यामुळे तारा तुटून स्पार्किंग होत होती. पोलीस हवालदार रवींद्र ठाकरे, भिकन सुतके आणि यतीन कुलकर्णी यांनी तातडीने घटनास्थळी धाव घेतली आणि लाकडी काठीच्या सहाय्याने विजेच्या तारा बाजूला केल्या, ज्यामुळे मोठा अनर्थ टळला आणि वाहनातील ३५ प्रवाशी थोडक्यात वाचले, मात्र एका महिलेचा दुर्दैवी मृत्यू झाला.