>> अमर घटारे

Sambhaji Bhide News: अमरावती येथे २७ जुलै रोजी येथील महापुरुषांबाबत वादग्रस्त विधान करून लोकांमध्ये असंतोष पसरविण्याचा आरोप असलेल्या संभाजी भिडे यांच्या वक्तव्याच्या ऑडिओ फॉरेन्सिक तपासणीसाठी पाठविण्यात येणार आहे. यासाठी राजापेठ पोलिसांनी संभाजी भिडे व आयोजकांना नोटीस जारी केली आहे.

संभाजी भिडे यांना ८ दिवसात अमरावती पोलीसाकडे हजर राहण्याचे आदेश देण्यात आले आहे. भिडे यांना दाखल गुन्ह्याच्या अनुषंगाने त्यांचे म्हणणे मांडण्याची सूचना करण्यात आली आहे. त्यामुळे ८ दिवसात संभाजी भिडे अमरावती पोलीसाकडे हजर राहतात का? याकडे लक्ष लागलं आहे.

तर याच संदर्भात राज्यात ज्या ठिकाणी भिडेवर गुन्हे दाखल झाले, त्या ठिकाणचे गुन्हे अमरावतीत वर्ग करण्यात आले असल्याची माहिती पोलिस आयुक्त नवीनचंद्र रेड्डी यांनी दिली

दरम्यान, संभाजी भिडे यांनी २७ जुलै रोजी सायंकाळी ६ ते १० या कालावधीत एका मंगल कार्यालयात उद्बोधन केले होते. त्या दरम्यान त्यांनी महापुरुषांबाबत वादग्रस्त विधान करून व लोकांमध्ये असंतोष पसरवून विविध समाजघटकांमध्ये वाद वाढविण्याचे भाष्य केले. तथा महापुरुषांची बदनामी केली. (Latest Marathi News)

या तक्रारीवरून राजापेठ पोलिसांनी संभाजी भिडेे (रा. सांगली), निशांतसिंह जोध, अविनाश मरकल्ले व इतरांविरुद्ध गुन्हा दाखल केला होता. त्या गुन्ह्याच्या अनुषंगाने संभाजी भिडे यांना नोटीस जारी करण्यात आली आहे. ती त्यांच्यापर्यंत पोहोचली आहे.